Báðu um salernisaðstöðu og voru rekin

Starfsmenn fyrirtæksins Stay Apartments kröfðust þess að fá fasta starfsmannaaðstöðu og var sagt upp í kjölfarið. Um átta starfsmenn er að ræða en kvartað var yfir því að enginn aðgangur væri fyrir starfsmenn að salerni og þá var engin kaffiaðstaða fyrir starfsmenn. Frá þessu var greint í kvöldfréttum RÚV.

Stay Apartments eiga sjötíu íbúðir á sex mismunandi stöðum á höfuðborgarsvæðinu.

Rætt var við Halldór Gerhard Meyer, eiganda Stay apartments, sem segist hafa reynt að bregðast við og benti á að starfsmenn gætu notað salernið í íbúðunum sem þau eru að þrífa. Halldór viðurkennir að hafa farið á svig við reglur í ellefu ár en samkvæmt reglugerð um húsnæði vinnustaða er skylda að starfsmenn hafi greiðan aðgang að salerni og snyrtingu.

Einn starfsmannanna segist í samtali við RÚV að starfsmennirnir hafi ekki látið undan kröfum sínum og fyrir um viku gengið hart á eftir þeim.

„Og sögðumst vilja hafa samband við Vinnueftirlitið og fá það með okkur í lið til að finna farsæla lausn á þessu vandamáli. Og þá gerast hlutirnir frekar hratt. Eftir að við leggjum þá tillögu til þá koma þeir með einhverjar hugmyndir en boða svo til fundar þar sem við héldum að þær hugmyndir yrðu ræddar en þá komu uppsagnarbréf á alla línuna,“ segir starfsmaðurinn, Ragnhildur Jóhannsdóttir. 

RÚV fjallaði um málið.