Ætlar í mark á hundrað ára hjóli

Ég fæ að hjóla með lokasprettinn,“ segir Þröstur Eysteinsson skógræktarstjóri og á við WOW Cyclo­thon hjólreiðakeppnina sem fram fer næstu sólarhringa. Hann verður á merkum grip, hjóli sem, Agnar Kofoed-Hansen átti en hann var fyrsti skógræktarstjóri landsins, gegndi embættinu frá 1908 til 1935 og hjólaði mikið um landið í embættiserindum.

Þröstur hefur verið skógræktarstjóri frá síðustu áramótum og hefur meðal annars leitt sameiningu Skógræktar ríkisins, Rannsóknastöðvar skógræktarinnar á Mógilsá og fimm skógræktarverkefna sem hafa verið starfrækt hvert í sínum landshluta. Þau eru Héraðsskógar, Suðurlandsskógar, Vesturlandsskógar, Skjólskógar á Vestfjörðum og Norðurlandsskógar.

Sameiningin er gerð fyrir atbeina Sigrúnar Magnúsdóttur umhverfisráðherra og gengur formlega í gildi 1. júlí.

„Ráðherrann ákvað líka að nafn stofnunarinnar skyldi vera Skógræktin svo við þyrftum nú ekki að byrja á að rífast um það,“ segir Þröstur hlæjandi.

Hann segir þetta í fyrsta skipti sem starfsfólk Skógræktarinnar tekur þátt í hjólreiðakeppninni stóru og ákveðið hafi verið að tengja það sameiningunni. Liðið er skipað tíu manns af báðum kynjum,  er úr öllum deildum sem sameinaðar verða og einum úr ráðuneytinu. Það mun keppa í flokki blandaðra liða.

„Þetta er svona hópeflisverkefni. Ég get ekki annað en stutt það, og geri það á minn hátt, með því að hjóla á þessu gamla hjóli síðasta spölinn í mark og það vill svo skemmtilega til að markið er í landi skógræktarinnar að Straumi við Krísuvíkurveg,“ segir Þröstur og kveðst ætla að bera klæðnað í þeim stíl sem hæfi hjólinu.