Hamilton fljótastur á heimavelli og Raikkonen áfram hjá Ferrari

Heimsmeistarinn Lewis Hamilton, ökumaður Mercedes liðsins var fljótastur á báðum æfingum dagsins. Breski kappaksturinn fer fram á Silverstone brautinni um helgina, heimavelli Hamilton.

Fyrri æfingin

Sebastian Vettel kom út á brautina á Ferrari bílnum með endurbættan geislabaug á bílnum. Það er höfuðvörnin sem Ferrari hefur mesta trú á.

Kimi Raikkonen hefur samið við Ferrari liðið. Hann verður hjá liðinu að minnsta kosti út næsta tímabil. Raikkonen varð sjötti á fyrri æfingunni.

Annar á æfingunni varð Nico Rosberg, liðsfélagi Hamilton. Hann var einungis 0,033 sekúndum á eftir Hamilton.

Nico Hulkenberg á Force India varð þriðji og Vettel á Ferrari fjórði.

Charles Leclerc þreytti frumraun sína með Haas liðinu og varð 18. rúmri sekúndu á eftir Romain Grosjean.

Seinni æfingin

Hamilton var einnig fljótastur á seinni æfingunni. Rosberg var í vandræðum og tókst ekki að ljúka hring eftir að olíuleki gerði vart við sig í Mercedes bíl hans.

Daniel Ricciardo á Red Bull varð annar á seinni æfingunni. Liðsfélagi hans, Max Verstappen varð þriðji. Red Bull bíllinn er greinilega að finna taktinn á Silverstone.

Bein útsending frá tímatökunni hefst klukkan 11:50 á morgun á Stöð 2 Sport og útsending frá keppninni hefst klukkan 11:30 á sunnudag einnig á Stöð 2 Sport.

Hér að neðan má finna öll helstu úrslit helgarinnar.