Mennirnir sem bjuggu til markið í úrslitaleik HM 2014 sameinaðir hjá Dortmund

Borussia Dortmund heldur áfram að styrkja sig fyrir átökin í vetur.

Í dag greindi Dortmund frá því að þýski landsliðsmaðurinn André Schürrle væri genginn í raðir liðsins frá Wolfsburg. Kaupverðið hefur ekki verið gefið upp en talið er að það sé í kringum 15,3 milljónir punda.

Hinn 25 ára gamli Schürrle skrifaði undir fimm ára samning við Dortmund sem endaði í 2. sæti þýsku úrvalsdeildarinnar á síðasta tímabili.

Í gær gekk Dortmund frá kaupunum á öðrum þýskum landsliðsmanni, Mario Götze, en þeir Schürrle bjuggu til markið sem tryggði Þýskalandi heimsmeistaratitilinn fyrir tveimur árum. Í úrslitaleiknum gegn Argentínu gaf Schürrle á Götze sem skoraði eina mark leiksins.

Schürrle lék áður með Mainz 05, Bayer Leverkusen og Wolfsburg í Þýskalandi og Chelsea á Englandi. Hann varð enskur meistari með Chelsea 2015 og þýskur bikarmeistari með Wolfsburg sama ár.

Dortmund mætir Manchester United í International Champions Cup í dag.

Leikurinn hefst klukkan 12:00 og verður sýndur í beinni útsendingu á Stöð 2 Sport HD.