Maðkurinn er kominn yfir 200 krónur stykkið

Ef það hefur einhvern tímann verið hvatning til að læra að kasta flugu þá er það núna.

Eins og veiðimenn þekkja þá er veiði á maðk á undanhaldi og þær eru orðnar fáar árnar sem leyfa veiði á maðki nema á jaðartímum með einhverjum undantekningum þó.  Ekki það að undirritaður sé á nokkurn hátt að gera lítið úr maðkveiði enda sjálfur haft ákaflega gaman af því að nota maðk þar sem það má og það er fátt eins gaman eins og að sjónrenna í lax.  Það er bara einn galli á gjöf Njarðar þegar kemur að maðkveiði, eða í raun tveir.

Maðk þarf að týna og ef þú gerir það ekki sjálfur á næturnar þá gerir það einhver fyrir þig.  Þeir sem hafa týnt maðk fyrir sig sjálfa þekkja alveg hvað það getur verið mikið vesen að ná í maðk í veiðitúra og hvað þá þegar það rignir lítið sem ekkert.  Þá verður leitin að orminum heldur erfið.

Gefum okkur það að þú hafir ekki tíma eða hreinlega nennir ekki næturbröltinu sem fylgir maðkatýnslu þá þarftu að greiða fyrir maðkinn og maðkur er vara sem fylgir lögmálum um framboð og eftirspurn þegar það kemur að verðlagningu.  Verðið á maðkinum í dag er komið í 250 krónur þar sem við fundum það hæst en almennt voru flestir að bjóða maðk á 200 krónur stykkið.  Já, stykkið!!

Ef það hefur ekki verið smá hvatning til að læra að kasta flugu þá hlýtur hún að vera komin núna þegar það á að rukka mann um 10.000 krónur hið minnsta fyrir poka af ormum.  Kíló af nautalund kostar 7.000-8.000 bara svona til að setja hlutina í samhengi já eða tvö kíló af nokkuð flottum humri eru líka föl fyrir sama pening.