BMW X5 besti meðalstóri lúxussportjeppinn að mati J.D. Power

Í niðurstöðum árlegrar könnunar sem J.D. Power gerir á gæðum nýrra bíla á bandaríska markaðnum (J.D. Power 2016 U.S. Initial Quality Study SM) kemur í ljós að BMW X5 er áreiðanlegasti meðalstóri lúxussportjeppinn. Niðurstöður J.D. Power sýna fjölda bilana eða tilfella sem þarf að láta athuga á hverja 100 bíla fyrstu 90 dagana frá því að nýi bíllinn var afhentur.  

Auk þess sem BMW X5 er sá besti í sínum flokki var X6 næst bestur í flokknum. BMW 2 Series hlaut annað sæti í flokki lítilla lúxusbíla (Small premium Cars), BMW X3 það þriðja í flokki minni lúxussportjeppa (Compact Premium SUV) og hinn nýi BMW X1 sömuleiðis í flokki lítilla lúxussportjeppa (Small Premium SUV). BMW 3 Series hlaut svo þriðja sæti í flokki minni lúxusbíla (Compact Premium Car).

Þrátt fyrir að finna megi sífellt meiri og flóknari hátæknibúnað í nýjum bílum, bæði til að auka þægindi farþega en ekki síst til að auka öryggi í umferðinni, fer áreiðnaleiki nýrra bíla vaxandi samkvæmt niðurstöðum J.D. Power sem segir að áreiðanleiki nýrra bíla hafi aukist um 6% frá könnuninni 2015 þegar hann jókst um 3% frá fyrra ári.

Niðurstöðurnar í ár eru mesta framfaraskref til aukinna gæða frá 2009 þrátt fyrir æ flóknari hátæknibúnað sem margir myndu búast við að kölluðu á fleiri „hnökra“. Því er semsagt þveröfugt farið og má geta þess að BMW sem framleiðandi er langt fyrir ofan meðaltalið á gæðastuðli J.D. Power.