Umfjöllun, viðtöl, myndir og einkunnir: Fjölnir - FH 0-1 | Emil kom inn á og tryggði FH-ingum stigin þrjú

FH vann sterkan sigur á Fjölni, 0-1, í 15. umferð Pepsi-deildar karla í kvöld.

Ernir Eyjólfsson, ljósmyndari Fréttablaðsins og Vísis, var á Extra-vellinum í kvöld og tók meðfylgjandi myndir.

Emil Pálsson skoraði eina mark leiksins með skalla eftir hornspyrnu Jonathans Hendrickx á 86. mínútu, aðeins nokkrum sekúndum eftir að hafa komið inn á sem varamaður.

FH er nú með 31 stig á toppi deildarinnar en Stjarnan getur minnkað forskot Íslandsmeistaranna í eitt stig með sigri á KR síðar kvöld.

Fjölnir er áfram í 3. sæti deildarinnar með 26 stig en liðið hefði getað komist á toppinn með sigri í kvöld.

Af hverju vann FH?

FH var síst sterkari aðilinn í leiknum en í liðinu eru mjög góðir leikmenn og unnu tveir slíkir að því að tryggja liðinu sigurinn. Jonathan Hendrickx átti mjög margar góðar hornspyrnu frá vinstri í leiknum og skilaði ein slík sigurmarkinu þar sem Emil Pálsson skallaði boltann í netið rétt eftir að hann kom inn á sem varamaður.

Varamenn FH gerðu í raun gæfumuninn því allar skiptingar Heimis höfðu jákvæð áhrif á leik liðsins. Liðið er vissulega öfundsvert af því að geta skipt Atla Guðnasyni, Emil og Kristjáni Flóka Finnbogasyni inn á en allt annað var að sjá leik liðsins eftir að þeir tveir síðar nefndu komu inn nokkuð á undan Emil.

Fjölnir getur nagað sig í handabökin að hafa ekki nýtt neina þeirra góðu sókna sem liðið átti í leiknum og þá ekki síst fyrri hálfleiknum þegar liðið var mun sterkari aðilinn í leiknum.

Þessir stóðu upp úr

Miðverðir beggja liða réðu vel við sóknarmenn andstæðinganna og átti Bergsveinn Ólafsson fína endurkomu á sinn gamla heimavöll. Davíð Þór Viðarsson var mjög sterkur fyrir framan hann í baráttunni við Igor Jugovic sem lék vel fyrir Fjölni.

Þórir Guðjónsson fór mikinn á vinstri kantinum hjá Fjölni og hefðu samherjar hans átt að nýta einhverja af fjölmörgum góðum fyrirgjöfum hans í leiknum.

Hvað gekk illa?

Fjölnir hefur skorað flest mörk allra liða í deildinni en náði ekki að nýta margar álitlega sóknir sínar í leiknum.

FH virtist eiga í vandræðum með að byggja upp góðar sóknir með bræðurna Davíð Þór og Bjarna Þór Viðarssyni á miðjunni. Þó enginn efist um getu Bjarna þá lék liðið mun betur eftir að honum var skipt útaf.

Þetta var þriðja sinn í sumar sem Fjölnir gat komist á topp Pepsi-deildarinnar með sigri og aldrei hefur liðinu tekist það. Munurinn á þessum leik og hinum tveimur er þó sá að liðið lék vel í þessum leik.

Hvað gerist næst?

Með sigrinum náði FH fimm stiga forystu á Fjölni á ný og tryggði toppsætið. Stjarnan er fjórum stigum á eftir FH en leikur við KR þegar þetta er ritað. FH fær einmitt Stjörnuna í heimsókn í næstu umferð í Kaplakrika 22. ágúst.

Deginum áður fer Fjölnir til Ólafsvíkur þar sem liðið mætir heimamönnum í Víkingi. Víkingur hefur verið í frjálsu falli síðasta mánuðinn og fær Fjölnir kærkomið tækifæri til að koma sér í betri stöðu í Evrópubaráttunni ef liðið hreinlega nálgast ekki toppinn á ný með sigri.

Emil: Sem betur fer datt boltinn á hausinn á mér

Emil Pálsson tryggði FH 1-0 sigur í kvöld með marki rétt eftir að hann kom inn á sem varamaður.

„Ég held það sé ekki hægt að eiga betri innkomu heldur en þetta. Koma inn og skora með fyrstu snertingu. Það verður ekki betra,“ sagði Emil strax eftir leik.

„Ég er yfirleitt með mitt svæði í hornum og ég fór bara í það og sem betur fer datt boltinn á hausinn á mér og ég náði að setja hann í netið.“

Emil lék um tíma á síðustu leiktíð með Fjölni á láni frá FH og kann hann einkar vel við sig á Extra-vellinum í Grafarvogi.

„Mér líður vel í Grafarvogi. Það var mjög gott að koma hingað til baka þó ég hefði viljað spila meira. En ég er ánægður með að hafa náð að setja mark mitt á leikinn.“

Emil var valinn leikmaður síðustu leiktíðar en varð að sætta sig við að byrja leikinn í dag á bekknum. Hann meiddist lítillega í síðasta leik gegn KR en hann sagði það ekki hafa haft neitt með það að gera.

„Ég get ekki sagt það. Við höfum verið upp og niður og hann (Heimir Guðjónsson þjálfari) hefur verið að hræra í liðinu og ég tek bara þeirri uppstillingu sem hann ákveður. Ég reyni bara að koma sterkur af bekknum og gera eitthvað,“ sagði Emil sem stóð við þau orð í leiknum í kvöld.

Heimir: Samstaða innan liðsins

„Við sýndum hörku góðan karakter á mjög erfiðum útivelli gegn gríðarlega öflugu Fjölnisliði,“ sagði Heimir Guðjónsson þjálfari FH.

„Þeir voru betri í fyrri hálfleik en við unnum okkur jafnt og þétt inn í leikinn. Við fengum okkar möguleika í seinni hálfleik og héldum alltaf áfram og náðum inn marki. Frábær sigur.“

Skiptingar Heimis í seinni hálfleik gerðu gæfumuninn fyrir FH í leiknum en Heimir vildi ekki hrósa sjálfum sér fyrir það.

„Ég held að það hafi verið samstaða innan liðsins um að gera þetta vel sem hafi skilað þessu. Menn voru tilbúnir að berjast hvorn fyrir annan og hjálpast að við þetta. Þegar það gerist hjá FH þá gerast góðir hlutir,“ sagði Heimir.

FH tapaði síðasta leik og hefði séð eftir toppsætinu hefði liðið tapaði í kvöld.

„Við höfum gefið færi á okkur en þetta á að hjálpa okkur í framhaldinu og ef við viljum að þetta hjálpi okkur þá gerir það það.“

Ólafur Páll: Einbeitingarleysi hjá mér persónulega

Ólafur Páll Snorrason var ómyrkur í máli og kenndi sjálfum sér um tapaði í kvöld.

„Við spiluðum fínan fótbolta í kvöld en við vorum ekkert að hugsa um að komast á toppinn. Það er nóg eftir af mótinu,“ sagði Ólafur Páll.

„FH er með frábært lið en við vorum töluvert sterkari aðilinn í leiknum að mínu mati. Það sem er svekkjandi er að tapa þessu á marki í lokin á einbeitingarleysi hjá mér persónulega. Ég tek það á mig.

„Það voru allir hinir á tánum á þessu tiltekna augnabliki. Ég tek það á mig og kem sterkari til baka. Ég er drullusvekktur að hafa tapað fyrir FH hér á heimavelli.“

Fjölnir fékk fjölda tækifæra til að skora í fyrri hálfleik og vantaði oft herslumuninn þegar liðið var komið í ákjósanlegar stöður.

„Við sköpuðum okkur fullt af tækifærum. Við vorum óheppnir upp við markið og fengum færi eftir aukaspyrnur, hornspyrnur og annað. Við spiluðum fínan fótbolta en töpuðum. Það fer illa með sálartetrið í kvöld að minnsta kosti,“ sagði Ólafur Páll.