Bílskúrinn: Heljarinnar björgun og hasar í Belgíu

Nico Rosberg á Mercedes kom fyrstur í mark í belgíska kappakstrinum og Lewis Hamilton vann sig upp um 18 sæti í keppni sem var full af hasar.

Fall Ferrari og hinn máttugi, magnaði eða sturlaði Max Verstappen verða til umræðu í Bílskúrnum, uppgjöri hvers kappaksturs á Vísi.

Fyrsta beygja skóp keppnina

Eftir slaka ræsingu Max Verstappen fóru báðir Ferrari ökumennirnir, Kimi Raikkonen og Sebastian Vettel samsíða honum inn í fyrstu beygju. Eins og Vettel sagði eftir keppnina þá „er ekki pláss fyrir þrjá bíla í einu þarna í gegn.“

Verstappen var innstur þeirra í beygjunni. Vettel stakk sér of innarlega til að pláss væri fyrir alla bílana í gegn. Raikkonen lokast á milli Verstappen og Vettel.

Þetta gerði það að verkum að allir þrír drógust aftur úr hrúgunni. Ferrari ætlaði sér að reyna að nýta fjarveru Hamilton í toppbaráttunni til að safna slatta af stigum. Ferrari fór í það að reyna að lágmarka skaðan eftir skelfilega byrjun.

Verstappen náði ekki í stig og ætla má að Ferrari liðið hafi fundið ákveðna huggun í því en hann átti eftir að valda þeim meiri vandræðum þegar á leið.

Stappaði Verstappen á tærnar á Raikkonen?

Raikkonen reyndi að taka fram úr Verstappen seinna í keppninni á leiðinni inn í fimmtu beygju. Þeir fóru hlið við hlið inn í beygjuna og snertust. Raikkonen þurfti að flýja út úr beygjunni til að forða tjóni. Raikkonen fannst á sér brotið og kvartaði í talstöðinni.

„Hann ýtti mér út af brautinni og hegðaði sér hættulega.“

Verstappen missti svo sjálfur bílinn út úr beygjunni. Ekki verður annað séð en að Verstappen hefði verið í lófa lagið og hreinlega borið að rýmka til fyrir Raikkonen svo hann hefði geta ekið inn á brautinni. Í stuttu máli, þá er það mat þess sem þetta skrifar að Verstappen hefði getað sleppt því að þvinga Raikkonen út af brautinni þarna.

Fernando Alonso á fleygiferð

McLaren bíllinn er búinn að vera slakur síðustu tvö tímabil. Ökumenn og starfsfólk liðsins hefur reynt að tala hann upp og allt að því tilgerðarleg bjartsýni þeirra hefur skinið út úr hverju opi.

Hins vegar virðist eitthvað að marka loforð þeirra um framfarir ef úrslit belgíska kappakstursins eru borin saman við uppröðun á ráslínu fyrir keppnina. Fernando Alonso ræsti af stað aftastur á ráslínu en endaði sjöundi. Orð Alonso eftir keppnina voru að þetta hefði verið óhugsandi fyrir tveimur mánuðum.

Vonandi fer McLaren að blanda sér í toppbaráttuna á næstunni. Þetta sögufræga lið hefur þurft að þola nóg í bili.

Hamilton lágmarkaði skaðan á Spa

Heimsmeistaranum tókst að vinna sig upp bæði með eigin getu og fyrir tilstilli eigin slembilukku. Hann hafði til dæmis ekki tekið þjónustuhlé þegar keppnin var stöðvuð. Hann fékk því frítt þjónustuhlé þar. Eins var talsvert um brottfall. Fimm ökumenn luku ekki keppni af 22.

Rosberg, liðsfélagi Hamilton og helsti keppinautur í heimsmeistarakeppni ökumanna vann á Spa eftir að hafa ræst af stað af ráspól. Rosberg gerði sér líklega vonir um að minnka forskot Hamilton enn meira á toppnum. Rosberg gerði þó allt sem hann gat fullkomlega. Hann minnkaði forskotið úr 19 stigum niður í níu. Það er betra en ekkert.

Það má því segja að Hamilton hafi tekist að lágmarka skaðan eins mikið og hægt var að vonast eftir. Spár liðsins fyrir keppnina voru á þann veg að Hamilton myndi enda áttundi. Heimsmeistaramótið er því einkar spennandi og átta keppnir eftir.

Ástandið á Kevin Magnussen

Hinn danski Kevin Magnussen lenti á varnarvegg efst í Eau Rouge beygjunni. Magnussen var á rúmlega 300 kílómetra hraða á klukkustund.

Þrátt fyrir að áreksturinn hafi litið illa út þá stóð Magnussen sjálfur upp úr bílnum eftir að yfir lauk.

Magnussen hefur sagt að hann muni aka á Monza brautinni á Ítalíu næstu helgi. Hann fékk smá skurð á vinstri ökkla en er annars heill heilsu.

Sjá einnig: Myndband af árekstri Kevin Magnussen.