Segir ekki hægt að sakfella Sigurð út af nánum tengslum hans við Hreiðar Má

Gestur Jónsson verjandi Sigurðar Einarssonar fyrrverandi stjórnarformanns segir skjólstæðing sinn ekki hafa átt neinn hlut að máli í þeim viðskiptum sem ákært er fyrir í markaðsmisnotkunarmáli Kaupþings en málið er flutt fyrir Hæstarétti í dag.

Sigurður er ákærður ásamt átta öðrum starfsmönnum Kaupþings. Er hann ákærður bæði fyrir markaðsmisnotkun og umboðssvik á tímabilinu nóvember 2007 til október 2008, en í héraði var hann dæmdur fyrir markaðsmisnotkun. Verjandi Sigurðar fór fram á sýknu en til vara ómerkingar á dómi héraðsdóms. Hann sagði skjólstæðing ekki skilja það hvernig hægt hafi verið að dæma hann í málinu og að hann gæti ekki sætt sig við það.

 

Gestur tiltók svo nokkur atriði til rökstuðnings sýknu í málinu. Nefndi hann meðal annars að Sigurður hafi búið í London á ákærutímabilinu og haft starfsstöð þar. Þá hafi hann ekki verið stjórnandi í daglegum rekstri bankans og deild eigin viðskipta Kaupþings, sem seldi og keypti óeðlilega mikið af hlutabréfum í bankanum sjálfum meðal annars að undirlagi Sigurðar að mati ákæruvaldsins, hafi hvorki heyrt beint né óbeint undir hann.

 

„Það er margsagt að hann hafði engin afskipti af starfsemi deildar eigin viðskipta á ákærutímabilinu og hann hefur sagt að hann hafi ekki einu sinni vitað hvernig var staðið var að viðskiptum deildar eigin viðskipta með hlutabréf í bankanum,” sagði  Gestur meðal annars.

Sjá einnig: Verjandi Hreiðars Más segir hann ekki hafa verið í aðstöðu til að fylgjast með viðskiptunum

 

Þá sagði Gestur að sú röksemdarfærsla héraðsdóms fyrir sakfellingu Sigurðar að hann og Hreiðar Már hafi verið í nánum tengslum gæti ekki staðist einfaldlega vegna þess að þeir væru ekki sami maðurinn. Sigurður hafi þar að auki ekki haft neina ástæðu til þess að ætla að eitthvað ólögmætt ætti sér stað í deild eigin viðskipta. 

Sagði Gestur jafnframt að það væri ranglega gengið út frá því að staða Sigurðar og Hreiðars Más innan Kaupþings hafi verið sú sama. Boðvald Sigurðar hafi verið að bera upp mál í stjórn félagsins auk þess sem hann hafi verið einn fjögurra manna í lánanefnd stjórnar. Hreiðar Már var hins vegar eins og kunnugt er forstjóri bankans.

Mismunun blasi við

Að mati Gests hefur skjólstæðingi síðan verið mismunað af hálfu ákæruvaldsins þar sem hann er eini stjórnarformaður stóru viðskiptabankanna þriggja sem ákærður er í markaðsmisnotkunarmáli, en ákært hefur verið í sambærilegum málum vegna Landsbankans og Glitnis.

Vísaði Gestur í ákæru í markaðsmisnotkunarmáli Glitnis sem þingfest var fyrr á árinu og sagði að þar lægi fyrir að stjórnarformaður bankans hefði samþykkt lánveitingar sem ákært er fyrir í málinu. Þó er stjórnarformaðurinn ekki ákærður heldur aðeins fyrrverandi forstjóri bankans, Lárus Welding. Sagði Gestur að mismunun blasi því við hvað varðar Sigurð Einarsson.