Goog­le, Face­book og fleiri tækni­risar í Hörpu á föstu­­dag

Facebook at Work, internetvæðing hlutanna hjá Google og sýndarveruleiki RVX í Hollywood-myndum er meðal þess sem fyrirlesarar fara yfir á Haustráðstefnu Advania.

Ráðstefnan fer fram í Hörpu á föstudaginn. Hægt er að kynna sér dagskránna nánar og skrá sig á heimasíðu hennar en af mörgu er að taka.

Meðal fyrirlesara er Guðmundur Hafsteinsson, sem stjórnar vöruþróun hjá Google. Guðmundur á langan feril að baki hjá tæknifyrirtækjum víðsvegar um heiminn og nefnist fyrirlestur hans Þriðja byltingin.

„Fyrsta tölvubyltingin sem náði til neytenda hófst með aðgengi að vefnum í gegnum borðtölvur. Fólk hafði þá greiðan aðgang að heilum heimi upplýsinga á eigin heimili. Önnur bylting hófst með tilkomu snjallsímans, sem breytti því hvernig fólk notar tæknilausnir og gerði upplýsingaflæðið persónulegra og aðgengilegra. Samhliða því að tæknin verður allt umlykjandi, stöndum við á mörkum þriðju tölvubyltingarinnar. Aðgengi fólks að upplýsingum og aðstoð verður ekki bundið við borðtölvur, fartölvur eða snjallsíma, heldur bíla, úr, hátalara, sjónvörp og fleira,“ segir í lýsingu á fyrirlestri Guðmundar.

Cathy Yum mætir frá Facebook og ætlar að skyggnast bak við tjöldin á Facebook at Work, sem mörg íslensk fyrirtæki hafa nú augastað á. Í erindi hennar verður skoðað hvernig Eimskip og Icelandair hafa bætt samskiptaleiðir og efla tengsl starfsfólks með Facebook at Work. Hún ræðir einnig við Ólaf William Hand frá Eimskip og Pétur Þ. Óskarsson frá Icelandair Group um innleiðinguna.

Öryggissérfræðingurinn Rik Ferguson fer á skemmtilegan hátt yfir grunnatriðin sem fyrirtæki klikka á þegar þau eru að koma sér upp skilvirkum öryggis- og eftirlitskerfum og ferlum. Ferguson leiðir rannsóknir á sviði netöryggis hjá Trend Micro og er einn af helstu netöryggissérfræðingum heims. Hann hefur sinnt ráðgjöf hjá öryggis og löggæslustofnunum, meðal annars Europol.

Daði Einarsson mun fjalla um spennandi hluti sem eru að gerast í heimi VR (Virtual Reality) og mun ræða hvernig RVX getur nýtt sér reynslu sína í myndbrellum fyrir Hollywood kvikmyndir til þess að skara fram úr í VR framleiðslu. RVX hefur séð um sjónrænar brellur í tengslum við margvísleg stór verkefni, aðallega við kvikmyndaframleiðslu í Hollywood. Daði Einarsson er einn af stofnendum RVX og hefur séð um stjón fyrirtækisins frá stofnun þess. Hann býr að viðamikilli reynslu sem hann hefur aflað sér bæði innanlands sem utan.

Ægir Már Þórisson, forstjóri Advania, setur ráðstefnuna klukkan 8.30 á föstudagsmorgun og stendur hún allan daginn.