Bein út­sending: Aðal­skoðun bíður eftir milljónasta við­skipta­vininum

Fyrirtækið Aðalskoðun fagnar stórum áfanga þessa dagana en viðskiptavinir þess telja nú um milljón. Í tilefni af þessu bryddar það upp á þeirri nýbreytni að streyma beinni útsendingu frá fimm af átta skoðunarstöðvum sínum á meðan beðið er eftir því að milljónasti viðskiptavinurinn renni með bílinn sinn á skoðunarbrautina.

Útsendingin er frá skoðunarstöðvunum í Hjallahrauni í Hafnarfirði, Skeifunni og Grjóthálsi í Reykjavík, við Skemmuveg í Kópavogi og Holtsgötu í Reykjanesbæ. Tekið verður höfðinglega á móti milljónasta viðskiptavininum og hann leystur út með gjöfum, flug fyrir tvo til Evrópu og fría skoðun í tíu ár.

„Þegar Aðalskoðun hóf starfsemi fyrir 21 ári síðan töldu flestir að erfitt yrði að keppa við aðila sem þá hafði notið einokunar í skjóli ríkisins í áratugi. Viðtökurnar voru frábærar strax frá upphafi og nú er svo komið að við erum að nálgast þann stóra áfanga að skoða milljónasta ökutækið okkar,“ segir Ómar Þorgils Pálmason, eigandi Aðalskoðunar, í fréttatilkynningu.

Hér fyrir neðan má sjá beinu útsendinguna. Búist er við því að milljónasti viðskiptavinurinn komi í dag eða á morgun.

Nánari upplýsingar um skoðunarstöðvar er að finna á heimasíðu Aðalskoðunar.

Hægt er að fylgjast með því hvernig talning viðskiptavinanna gengur á Facebook-síðu fyrirtækisins.

Uppfært 30. 9. klukkan 10.00.

Miðað við þróun gærdagsins þá lítur út fyrir að sá milljónasti muni detta inn öðru hvoru megin við hádegi í dag og má því reikna með góðri aðsókn á skoðunarstöðvarnar.

Landinn hefur tekið vel í nýbreytni Aðalskoðunar en yfir fjögur þúsund manns hafa nú þegar fylgst með beinni útsendingu frá skoðunarstöðvunum. 

Það ríkir ekki bara eftirvænting hjá þeim sem hafa verið að stilla sig inn á beinu útsendinguna því starfsmenn Aðalskoðunar bíða einnig spenntir eftir milljónasta bílnum. 

„Þetta hefur kryddað upp á lífið hér hjá Aðlaskoðun þar sem starfsmenn vita aldrei hvort að bílinn sem verið er að skoða verði sá milljónasti,” segir Hörður Harðarson hjá Aðalskoðun.