Hafa selt 737 eignir á árinu

Íbúðalánasjóður seldi samtals 41 eign í ágúst mánuði.  Til viðbótar þeim eignum sem seldar voru hefur Íbúðalánasjóður samþykkt kauptilboð í 86 eignir og vinna nú tilboðsgjafar að fjármögnun þeirra. Í lok mánaðar átti Íbúðalánasjóður 772 íbúðir samanborið við 1.348 í ársbyrjun. Sjóðurinn hefur selt 737 eignir á árinu eða 20 prósent fleiri eignir en á sama tímabili árið 2015 þegar seldar voru 618 eignir, segir í tilkynningu.

Vanskil dragast saman

Vanskil lögaðila hafa dregist verulega saman á undanförnum mánuðum í tengslum við fjárhagslega endurskipulagningu lögaðila. Í lok ágúst nam fjárhæð vanskila útlána til lögaðila 583 milljónum króna og var undirliggjandi lánavirði 2,5 milljarðar króna eða um 1,8 prósent útlána sjóðsins til lögaðila. Til samanburðar var undirliggjandi lánavirði vanskila útlána til lögaðila 16,5 milljarðar í upphafi árs, það er 14 milljarða króna lækkun á átta mánuðum. Vanskil einstaklinga standa í stað í ágúst eftir samfellda lækkun frá júlí 2015. Vanskil ná samtals til 3,5 prósent lánasafnsins, en sambærilegt hlutfall í ársbyrjun var 6,93 prósent.