Bob Dylan vinsamlegast beðinn um að hafa samband við Nóbelsnefndina

Sænska Nóbelsakademían hefur enn ekki tekist að ná sambandi við Bob Dylan.

Greint var frá því í morgun að Dylan hefði hlotið bókmenntaverðlaun Nóbels fyrir textasmíð sína og framlag til bandarískrar tónlistar.

Í frétt Dagens Nyheter kemur fram að enginn viti með vissu hvar Dylan sé niður kominn, en vitað er að hann á að koma fram á tónleikum í Las Vegas í kvöld.

Sara Danius, framkvæmdastjóri Nóbelsnefndarinnar, segist enn ekki hafa tekist að hafa uppi á verðlaunahafanum. Um 13:30 hafi nefndinni tekist að fá síma- og tölvupóstsupplýsingar mannsins sem stjórnar tónleikaferð Dylans, en um klukkan 15 hafði hins vegar enn ekki tekist að ræða við Dylan sjálfan.

„Bob Dylan sefur,“ er haft eftir Danius.