Meira en fimmföldun í gagnaflutningsnotkun í farsímum

Á fyrstu 6 mánuðum þessa árs hafa viðskiptavinir 365 í farsímaþjónustu aukið verulega við gagnaflutningsnotkun sína, samanborið við fyrra ár. Aukningin nemur 443% og er bein afleiðing af nýjum áskriftaleiðum sem kynntar voru í upphafi þessa árs. Þetta kemur fram í tilkynningu frá 365.

„Það eru nokkrar ástæður fyrir því að við erum að sjá þessa miklu aukningu. Við kynntum fyrr á árinu, fyrst fyrirtækja á fjarskiptamarkaði, að viðskiptavinir okkar þurftu ekki að hafa áhyggjur af notkun á gagnaflutningi í farsíma.  Stærsti hluti okkar viðskiptavina greiðir einungis 3.000 kr. á mánuði fyrir öll símtöl, sms og gagnaflutning og þetta kann fólk að meta. Fjöldi viðskiptavina okkar segist vera að spara fjölskyldunni allt að 100.000 kr. á ári með því að vera með farsímana hjá 365,“ segir Sævar Freyr Þráinsson, forstjóri 365.

365 býður þjónustu sína yfir 3G og 4G dreifikerfi Símans. Þannig hafa allir landsmenn aðgang að þjónustu 365.  Engin skilyrði eru fyrir því að kaupa sjónvarpsáskriftir hjá 365 til þess að njóta kjaranna að því er fram kemur í tilkynningunni.  

Deila klippum á samfélagsmiðlum

„Nú eru um 7 þúsund sjónvarpsáskrifendur 365  búnir að sækja sér 365 app í snjallsíma, spjaldtölvur og AppleTV en það fylgir án aukakostnaðar með sjónvarpsáskrift hjá 365. Þar er hægt að horfa í öllum snjalltækjum á allar helstu sjónvarpsstöðvar,“ segir Sævar.

Hann segist sérstaklega ánægður með hve viðskiptavinir 365 séu duglegir að nýta sér nýjungar sem einungis séu í boði hjá 365, t.d. að deila allt að 10 sekúndna klippum  af íþróttakappleikjum á Facebook og Twitter.  

„Viðskiptavinir okkar geta horft á sjónvarp hvar sem er, hvenær sem er og á hvaða tæki sem er og það án þess að þurfa að hafa áhyggjur af því að reikningurinn hækki. Þetta er gríðarleg kjarabót fyrir alla,“ segir Sævar Freyr.