Vonast eftir afgerandi kosningu

Bjarni Benediktsson, formaður Sjálfstæðisflokksins, vonast eftir afgerandi kosningu. Hann segir núverandi stjórnarflokka ekki líklega til að halda meirihluta á þingi og bíður hann „spenntur“ eftir niðurstöðunum.

Bjarni kaus í Fjölbrautaskóla Garðabæjar nú í morgun, þar sem fréttastofa 365 náði tali af honum.

„Maður er mjög spenntur. Ég sé það á könnunum að þetta er mjög knappt þannig að ég geri ráð fyrir því að úrslitin geti ráðist mjög seint. Flestir munu eflaust horfa á það hvort að núverandi stjórnarandstöðuflokkar ná meirihluta þingmanna, en í því sambandi skiptir miklu hver sá meirihluti kann að verða. Ég vonast til þess að það gerist ekki og við fáum afgerandi kosningu.

Svo verðum við bara að vinna með þá stöðu sem að kjósendur gefa okkur.“

Bjarni segir „ekki hægt að segja“ að Sjálfstæðisflokkurinn hafi staðið í óformlegum viðræðum við aðra flokka fyrir kosningarnar.

„Við erum auðvitað í stjórnarsamstarfi og við höfum farið yfir þá stöðu. Eitt af því sem við höfum séð ásamt Framsóknarflokknum er að þessir tveir flokkar eru ekki líklegir til að halda þeim meirihluta í þinginu sem þeir hafa í dag. Þannig að við höfum aðeins rætt það.“

Þá vildi Bjarni ekki segja til um hver ákjósanlegasti flokkurinn væri til að koma inn í stjórnarsamstarfið.

„Ég bíð spenntur, eins og aðrir landsmenn, að sjá hvernig þingið raðast saman og við verðum einfaldlega að líta í eigin barm, hvert og eitt okkar, og spyrja: Hvað getum við gert til þess að vinna landinu sem allra mest gagn? Gera flestum sem mest gagn í ljósi þeirrar niðurstöðu sem að fæst í kvöld. Ég ætla að vera svolítið opinn í huganum þegar ég geng til þess verks,“ segir Bjarni.

Spurður út í kosningabaráttuna segir Bjarni að honum finnist sjónvarpið hafa sinnt baráttunni meira en oft áður.

„Samfélagsmiðlar eru að riðla sér meira inn á þennan vettvang. Að hluta til er það vegna þess að flokkarnir vilja finna leiðir til þess að verja minni fjármunum í kosningabaráttuna, þannig að því leyti er þetta aðeins að breytast. Það einkennir líka baráttuna núna hvað það eru margir flokkar. Margir flokkar sem eiga möguleika á þingsæti.

Þetta hefur um margt verið dálítið sérstök kosningabarátta og kannski helst það hvað það er miklu meiri umræða á samfélagsmiðlum og meiri kynning á flokkunum og frambjóðendum þar, heldur en átti við þegar ég var fyrst kjörinn á þing 2003. Þetta er eins og svart og hvítt.“