Hamilton fljótastur á báðum æfingum fyrir einvígið í eyðimörkinni

Lewis Hamilton, maðurinn sem þarf að vinna upp 12 stiga forskot liðsfélaga síns, Nico Rosberg var fljótastur á báðum æfingum dagsins fyrir lokakeppnina á tímabilinu í Formúlu 1.

Fyrri æfingin

Hamilton var talsvert fljótari á fyrri æfingunni, hann var 0,374 sekúndum á undan Rosberg.

Rosberg hefur 12 stiga forskot í heimsmeistarakeppni ökumanna. Það er því klárt að Hamilton þarf að gera allt hvað hann getur til að verða meistari.

Ef Hamilton vinnur keppnina á sunnudag þá þarf Rosberg að komast á verðlaunapall til að verða meistari. Ef Hamilton verður annar þarf Rosberg að verða sjötti til að verða heimsmeistari og ef Hamilton verður þriðji þá þarf Rosberg að verða áttundi.

Staðan er hins vegar ljós ef Hamilton verður fjórði eða neðar, þá verður Rosberg meistari.

Red Bull bílarnir voru þeir næstu á eftir Mercedes á fyrri æfingunni. Max Verstappen varð þriðji og Daniel Ricciardo varð fjórði.

Seinni æfingin

Hamilton hafði aftur betur á seinni æfingunni en það munaði einungis 0,079 sekúndum á liðsfélögunum.

Sebastian Vettel á Ferrari varð þriðji, innan við þremur tíundu úr sekúndum á eftir Hamilton. Red Bull ökumennirnir komu þar á eftir. Kimi Raikkonen á Ferrari varð svo sjötti. Hann var síðastur þeirra sem voru innan við sekúndu á eftir Hamilton.

Daniil Kvyat á Toro Rosso lenti í því að sprengja dekk á báðum æfingunum svo liðið þurfti að rannsaka bílinn enda undarlegt slíkt komi fyrir.

Tímatakan á morgun verður spennandi á morgun en keppnin verður auðvitað vettvangurinn þar sem úrslitin ráðast á sunnudag.

Lokakeppni tímabilsins fer fram um komandi helgi. Bein útsending frá tímatökunni hefst klukkan 12:50 á laugardag á Stöð 2 Sport 3. Bein útsending frá keppninni hefst svo klukkan 12:30 á sunnudag á Stöð 2 Sport.

Hér að neðan má sjá öll helstu úrslit helgarinnar á gagnvirku brautarkorti.