Sjáðu fallegt fyrsta mark Mkhitaryan fyrir Manchester United

Henrikh Mkhitaryan skoraði sitt fyrsta mark fyrir Manchester United í gærkvöldi þegar liðið lagði Zorya Luhansk í lokaumferð riðlakeppni Evrópudeildar UEFA, 2-0.

Armenski landsliðsmaðurinn hefur átt erfitt uppdráttar hjá United í byrjun tímabils en gríðarlega væntingar voru gerðar til Mkhitaryan sem var kjörinn besti leikmaður þýsku 1. deildarinnar á síðustu leiktíð.

Sjá einnig:Þetta eru liðin sem United getur mætt í 32 liða úrslitunum

Markið sem Mkhitaryan skoraði var virkilega huggulegt en hann vann boltann á miðjum vellinum, straujaði sjálfur fram að vítateig Zorya, lék boltanum á milli fóta eins Úkraínumannsins og lagði boltann snyrtilega í netið.

„Hann er búinn að leggja mikið á sig andlega og líkamlega og við vitum að hæfileikarnir eru til staðar. Hæfileikarnir sem við vissum að við keyptum,“ sagði José Mourinho um Armenann eftir leikinn.

Markið hans Mkhitaryan auk mark Zlatans Ibrahimovic má sjá í spilaranum hér að ofan en hér að neðan má sjá mörkin úr leik Southampton og Hapoel Beer Sheva.