Real Madrid setti félagsmet

Real Madrid setti félagsmet í gærkvöldi þegar liðið vann 3-2 sigur á Deportivo La Coruna á heimavelli.

Real Madrid hefur nú leikið 35 leiki í öllum keppnum án þess bíða ósigur. Gamla metið var frá tímabilinu 1988-89 þegar Real Madrid lék 34 leiki í röð án þess að tapa.

Real Madrid tapaði síðast fyrir Wolfsburg í fyrri leik liðanna í átta liða úrslitum Meistaradeildar Evrópu 6. apríl síðastliðinn. Síðan þá hafa Madrídingar leikið 35 leiki, unnið 24 og gert níu jafntefli. Markatalan er 94-31.

Real Madrid hefur aðeins tapað tveimur af 51 leik undir stjórn Zinedine Zidane sem tók við liðinu í byrjun þessa árs. Á þessu ári hans við stjórnvölinn hefur Real Madrid unnið Meistaradeild Evrópu og Ofurbikar Evrópu.

Real Madrid er ósigrað í 27 deildarleikjum í röð en Barcelona á metið (39 leikir).

Það munaði litlu að Real Madrid fengi ekkert út úr leiknum gegn Deportivo í gær. Liðið var 1-2 undir þegar sex mínútur voru eftir en þökk sé mörkum frá Mariano Díaz og Sergio Ramos fengu Evrópumeistararnir öll stigin þrjú.