Farþegi rekinn út úr flugvél: Sá dóttur Trump og reiddist

Farþegi um borð í flugvél á vegum bandaríska flugfélagsins JetBlue var rekinn út í dag eftir að hafa reiðst þegar hann kom um borð og sá að Ivanka Trump, dóttir verðandi forseta Bandaríkjanna var með honum í flugvélinni. Reuters greinir frá.

Annar farþegi lýsir atvikinu þannig að þegar viðkomandi sá Ivönku hafi hann dæst og sagt „Guð minn góður, þetta er martröð!“

Hann hafi svo virst órólegur eftir að hafa fengið sér sæti og þegar starfsmaður flugfélagsins hafi spurt farþegann hvort ekki væri í lagi með hann á hann að hafa svarað til baka: „Þau eyðileggja landið okkar og nú reyna þau að eyðileggja flugið okkar!“

Í tilkynningu frá flugfélaginu segir að það sé aldrei auðveld ákvörðun að henda farþega útúr flugvél en tekur fram að fundið hafi verið annað flug fyrir viðkomandi.

Ivanka var á leiðinni í frí til Hawaii.