Konan sem féll í sjóinn við Kirkjufjöru er látin

Þýsk kona sem féll í sjóinn við Kirkjufjöru skammt austan Dyrhólaeyjar fyrr í dag er látin. Konan var úrskurðuð látin við komu til Reykjavíkur.

Allt tiltækt lið lögreglu og björgunarsveita á Suðurlandi, auk þyrlunnar og björgunarskipsins Þórs, var kallað út um klukkan 13 í dag eftir að tilkynnt var um að konan hefði farið í sjóinn. Mikið brim var í fjörunni og voru aðstæður til leitarinnar því erfiðar.

Konan fannst vestast í Reynisfjöru klukkan rúmlega 14 en leitin tók um það bil eina klukkustund.

Konan, sem var 47 ára, var í för með fjölskyldu sinni þegar slysið átti sér stað. Eiginmaður hennar og tvö börn höfnuðu einnig í sjónum, en tókst þeim sjálfum að koma sér upp úr og munu þau ekki hafa slasast.