Vinkonur Birnu: Yndisleg vinkona og hefur ekki einu sinni reykt gras

Enn hefur ekkert spurst til Birnu Brjánsdóttur, sem hvarf aðfaranótt laugardags. Vinkonur Birnu, þær María Bjarnadóttir og Matthildur Soffía Jónsdóttir  voru meðal viðmælanda í kvöldfréttum Stöðvar 2 í kvöld, ásamt Sigurlaugu Hreinsdóttur, móður Birnu.

Önnur vinkvenna Birnu, Matthildur, var með Birnu á skemmtistaðnum Húrra nóttina sem hún hvarf. María vinnur með Birnu og hóf að hringja í vini og vandamenn þegar Birna skilaði sér ekki til vinnu í hádeginu á laugardag. Þær lýsa Birnu sem glaðlyndri, traustri vinkonu - sem leggur það ekki í vana sinn að láta ekki ná í sig.

Þetta var fullkomlega eðlilegt kvöld

Aðspurð hvernig atburðarrásin var þegar þær hafi farið ákveðið að fara út að skemmta sér segir Matthildur að þær hafi velt fyrir sér hvort þær væru í skapi til að fara út að skemmta sér áður en þær ákváðu að slá til og  halda niðrí miðbæ.

„Við förum á Nora Magasin og spilum þar í smá tíma, ákveðum svo að fara á Húrra að dansa smá. Hún var í svaka stuði og rosalega hress þetta kvöld“ segir Matthildur.

Vinkonur Birnu segja óeðlilegt að Birna hafi skilið eftir eigur sínar í bílnum sem hún fór á í bæinn. „Hún skilur töskuna sína eftir í bílnum, sem hún myndi alltaf taka með sér ef hún myndi fara eitthvert að gista.“

Þær hafi verið saman á Húrra þar til klukkan tvö þegar Matthildur ákvað að fara heim. Birna varð eftir á skemmtistaðnum með sameiginlegri vinkonu þeirra.

María átti svo von á því að hitta Birnu í vinnu á laugardag. „Hún átti að mæta klukkan tólf og hringdi sig ekki inn veika eða neitt, ég prófaði að hringja í hana og þá var slökkt á símanum hennar“ segir María sem athugaði þá hvort að nokkrir sameiginlegir vinir þeirra vissu eitthvað um hana, en enginn vissi neitt.

„Þetta var fullkomlega eðlilegt kvöld, það var ekkert sem ég var vör við, hún var í mjög góðu skapi“ segir Matthildur aðspurð um það hvort hún hafi tekið eftir einhverju óeðlilegu á skemmtistaðnum Húrra þetta kvöld.

Skipulögð leit lögreglu og björgunarsveita hófst formlega í dag og voru foreldrar Birnu kallaðir á fund af lögreglu í nótt þar sem farið var yfir atburðarásina og hvernig vinna lögreglu við leitina færi fram. „Við fengum beint símanúmer þar sem ég get alltaf náð í lögreglumann sem er í stöðugu sambandi við mig um að gefa mér upplýsingar“ segir Sigurlaug, móðir Birnu.

Móðir Birnu segir allt óeðlilegt sem gerist snemma á laugardagsmorgni miðað við daglegar venjur Birnu. „Að hún sjáist ekki online, hún er alltaf með messenger opinn, það er alltaf hægt að ná í hana og yfirleitt líður ekki meira en hálftími þar til hún svarar” en Birna hefur ávallt verið góður vinur foreldra sinna.

Yndisleg vinkona og sjálfstæð stelpa með svartan húmor

Að sögn vinkvenna Birnu var hún einstakur vinur. „Hún er yndisleg vinkona, alltaf til staðar fyrir mann og hún er ein besta vinkona sem ég hef eignast á ævi minni, ég treysti henni fyrir öllu og ég elska hana“ segir Matthildur sem tekur fram að Birna hafi aldrei verið í neinu rugli. „Hún reykir ekki einu sinni gras eins og flestir unglingar hafa prófað, hún kemur ekki nálægt neinu.“

Þá segir Sigurlaug, móðir Birnu að hún sé mjög sjálfstæð stelpa með mjög svartan húmor. Margir hafi talað við Sigurlaugu og haft áhyggjur af því eftir að hafa skoðað Facebook síðu Birnu að hún hafi verið eitthvað niðurdregin, en að sögn móður hennar er það einungis vitnisburður um svartan húmor hennar. Birna hafi alla tíð verið mjög opin.

Samkvæmt vinkonum Birnu, þeim Matthildi og Maríu er Birna stöðugt tengd við umheiminn í gegnum farsímann sinn. „Hún er týpan til að vera með ferðahleðslutæki“ segir Matthildur og því sé hvarf hennar mjög óeðlilegt.

Sigurlaug segir ekkert óeðlilegt hafa verið við hegðun Birnu undanfarna daga. Þær hafi þó ekki hist dagana á undan hvarfi hennar. „Ég varð ekki vör við neitt, ég hef farið margoft í gegnum þetta í huganum og það er ekkert sem bendir til þess að eitthvað óeðlilegt hafi verið í gangi.“

Fjölskylda og vinir Birnu er harmi slegin yfir því að Birna skuli enn vera ófundin. Þau biðla til almennings um að koma öllum upplýsingum til lögreglu sem geta gefið upplýsingar um ferðir hennar.

Vinkonur Birnu eru mjög þakklátar öllum þeim sem hafa komið að leitarstörfum og vonast til þess að hún muni finnast fljótlega.