Viljum leggja okkar af mörkum

„Leitin að Birnu og lát hennar snerti okkur öll sem stöndum að sýningunni Andaðu, þótt við héldum okkar striki og ynnum að uppsetningunni í Iðnó meðan á atburðum stóð.

Okkur langar að leggja okkar af mörkum og allt sem kemur inn vegna sýningarinnar annað kvöld, miðvikudag, fer því til Landsbjargar. Iðnó gefur sitt og enginn er að taka laun,“ segir Þórey Sigþórsdóttir, leikstjóri leikritsins Andaðu.

„Sýningin fjallar, að hluta til, um hvernig við tökum ábyrgð í lífinu. Það er því vel við hæfi að við tökum eitthvert skref í því að vera góðar manneskjur,“ segir Þórey. „Efnislega er það alveg í anda verksins þó að auðvitað geri maður aldrei nóg.“

Þetta verður 6. sýningin á Andaðu, verðlaunaleikriti eftir Duncan Macmillan. Dóttir Þóreyjar, Hera Hilmarsdóttir, þýddi það og er í öðru hlutverkinu af tveimur, hitt er í höndum Þorvaldar Davíðs Kristjánssonar.

 „Áhorfendur eru flugur á vegg hjá ungu pari og fylgjast með lífi þess og pælingum,“ segir Þórey. „Við höfum fengið sterk viðbrögð við sýningunni því hún hreyfir við fólki og fær það til að hugsa.“

 

Greinin birtist fyrst í Fréttablaðinu 7. febrúar 2017