Þessi kappi er sögulega erfiður andstæðingur fyrir Real Madrid

Real Madrid tapaði óvænt í gær fyrir Valencia í spænsku deildinni í fótbolta en Valencia vann 2-1 sigur eftir að hafa skorað tvisvar á fyrstu tíu mínútum leiksins.

Fabián Orellana skoraði seinna mark Valencia á 9. mínútu leiksins og það mark var sögulegt.

Þetta var nefnilega annað mark Fabián Orellana á móti Real Madrid á þessu tímabili en það sem gerir það sögulegt er að hann skoraði hitt markið fyrir Celta de Vigo í ágúst.

Aldrei áður hafði leikmanni tekist að skora fyrir tvö félög á móti Real Madrid á sama tímabili. Tvö af þremur mörkum Fabián Orellana á tímabilinu hafa þar með komið á móti Real Madrid.

Celta de Vigo lánaði Fabián Orellana til Valencia 31. janúar síðastliðinn eftir honum lenti upp á kanti við þjálfarann Eduardo Berizzo.

Fabián Orellana er 31 árs gamall Sílemaður sem hafði spilað með Celta de Vigo frá árinu 2013.

HISTÓRICO FABIÁN ORELLANA!!!!
PRIMER JUGADOR que le marca al Real Madrid con DOS EQUIPOS (Celta y Valencia) en una misma edición de #LaLiga. pic.twitter.com/1OsFjl7uvq

— MisterChip (Alexis) (@2010MisterChip) February 22, 2017