Griezmann tryggði Atletico Madrid stigin þrjú undir lokin

Atletico Madrid vann góðan sigur á Granada, 1-0, í spænsku úrvalsdeildinni í knattspyrnu. Leikurinn var heldur bragðdaufur og var staðan 0-0 í hálfleik.

Það leit allt út fyrir að leikurinn myndi enda með markalausu jafntefli en Frakkinn Antoine Griezmann var á öðru máli. Hann skoraði fínt mark á 84. mínútu leiksins og tryggði Atletico Madrid mikilvæg þrjú stig. Sverrir Ingi Ingason lék allan leikinn fyrir Granada í hjarta varnarinnar.

Atletico Madrid er í 4. sæti deildarinnar með 52 stig, sjö stigum á eftir Real Madrid sem er í efsta sætinu.

Granada er í 18. sæti með 24 stig og er liðið í fallsæti.