Heimir um mál Viðars: Tímasetning spurningarinnar kjánaleg

Heimir Hallgrímsson segir að spurning sem hann fékk frá blaðamanni Vísis á fjölmiðlafundi KSÍ á föstudag um Viðar Örn Kjartansson hafi komið honum á óvart.

Eins og fjallað var um á föstudag spurði Kolbeinn Tumi Daðason landsliðsþjálfarann um atvik sem átti sér stað í haust, þegar landsliðið kom saman hér í Parma til að undirbúa sig fyrir landsleik gegn Króatíu í undankeppni HM 2018.

Sjá einnig: Mætti ölvaður til móts við íslenska landsliðið á Ítalíu

„Já, það sást á mér að ég var ekki undirbúinn fyrir þetta enda fjögurra mánaða gamalt mál,“ sagði Heimir og vildi meina að málið hafi verið á allra vörum mánuðina fyrir blaðamannafundinn, þó svo að ekkert hafi verið fjallað um það í fjölmiðlum fyrir hann.

„Þetta er búið að vera á allra vörum. Þetta er ekki eitthvað sem Kolbeinn Tumi Daðason heyrði daginn áður. Í undirbúningi landsliðsins fyrir svona ofboðslega mikilvægan leik, þá fannst mér þetta vera kjánalegt.“

Sjá einnig: Hans mál hvað hann gerir áður en kemur í landsliðsverkefni

Hann bendir á að hingað til hafi KSÍ og allir tengdir landsliðinu átt í góðum samskiptum við fjölmiðla og ekki skorast undan viðtölum eða spurningum.

„Það höfum við alltaf gert heiðarlega eins og við gerðum á þessum blaðamannafundi. En kannski var tímasetninginn kjánaleg og tilgangurinn - ég veit það ekki, hver hann var með þessari spurningu.“

Heimir játar því að blaðamönnum sé vissulega heimilt að bera upp þær spurningar sem þeir kjósa á opnum blaðamannafundum.

„Alveg sjálfsagt. En þetta var svolítið úr takti því þetta var fjögurra mánaða gamalt mál. Það voru örugglega allir íþróttafréttamenn sem vissu af þessu og töldu þetta ekki vera stórmál. Þetta var afgreitt af okkur fyrir fjórum mánuðum síðan.“

Sjá einnig: Viðar Örn tjáir sig: Löngu hættur að drekka áður en ég mætti til móts við landsliðið

Hann segir að spurningin hafi því komið á óvart en allt í lagi að svara henni. Enn fremur sagði hann að það hefði aldrei komið til þess að endurskoða val hans á Viðari Erni í landsliðið.

„Við tókum á þessu þegar þetta gerðist og það væri kjánalegt að refsa honum seinna.“

Heimir segir að það sé rætt innan landsliðsins fari ekki út fyrir hópinn.

„Við reynum að tækla öll mál og afgreiða þau. Við reynum að bæta okkur líka. Það er einn hluti af því. Það er hægt að nýta sér svona lagað líka.“

Athugasemd ritstjórnar

Að gefnu tilefni er rétt að taka fram að hvorki Kolbeinn Tumi Daðason né aðrir íþróttafréttamenn 365 miðla höfðu vitneskju um mál Viðars Arnar fyrr en tveimur dögum fyrir fundinn. Fullyrðing landsliðsþjálfara, að málið hafi verið á allra vörum síðan í nóvember, á ekki við fréttastofu 365.