Ákærð fyrir að gefa eiginmanni sínum Subway

Héraðsdómur Suðurlands hefur sýknað konu af ákæru fyrir fjárdrátt. Var konunni gefið að sök að hafa, mánudaginn 16. mars 2015, er hún var við afgreiðslustörf á veitingastað Subway, útbúið 12 tommu bát og afhent eiginmanni sínum bátinn og pappamál, samtals að andvirði 1.568 krónur. Konan hafði ekki stimplað vörurnar inn og greitt fyrir þær.

Þá var hún einnig ákærð fyrir að hafa dregið sér fé úr sjóðsvél veitingastaðarins þegar hún starfaði þar sem verslunarstjóri með því að hafa eytt út sölufærslum en tekið við andvirði þeirra í reiðufé af viðskiptavinum og sett í sjóðsvélina. Seinna hafi konan tekið samsvarandi fjárhæð úr uppgjöri veitingastaðarins í sínar vörslur, alls í sjö skipti samtals 12.589 krónur.

Stjarnan ehf, sem rekur veitingastaði Subway, kærði málið til lögreglu í lok apríl árið 2015 en konunni var sagt upp í lok mars 2015 þegar upp komst um málið.

Þess var krafist að konan yrði dæmd til að greiða fyrirtækinu skaðabætur að fjárhæð 12.589 krónur ásamt vöxtum. Í öðru lagi var þess krafist að hún greiddi skaðabætur að fjárhæð 1.568 krónur.

Í dómi héraðsdóms segir að ekkert vitni hafi fyrir dómi lýst því að það hafi séð eða orðið vitni að því að konan hefði á ólögmætan hátt tekið peninga úr peningakassanum á Subway-staðnum.

Konan gaf þær skýringar að kassinn hafi verið leiðinlegur og eyðslufærslurnar mætti rekja til þess að hún reyndi að fá hann til að virka. Hún sagði kassann iðulega hafa frosið og þá hafi þurft að endurræsa hann. Það tæki nokkrar mínútur sem væru ekki í boði á meðan viðskiptavinir biðu eftir afgreiðslu.

Hvað bátinn til eiginmannsins varðar sagðist hún hafa fengið þau fyrirmæli frá skrifstofunni að greiða honum á þennan hátt fyrir ýmis smáviðvik. Fyrirmælin hafi komið frá gæðastjóra sem hafi verið yfirmaður hennar á þessum tíma. Ekki hafi fylgt þessu nein nánari fyrirmæli um hvernig þetta skyldi gert.

Héraðsdómur Suðurlands sýknaði konuna af öllum kröfum ákæruvaldsins á þesim forsendum að ekki væri hafið yfir skynsaman vafa að hún hafi dregið að sér fé.