Sauber notar Honda vélar 2018

Sauber liðið í Formúlu 1 hefur gert samning við japanska vélaframleiðandan Honda um vélakaup á næsta ári. Honda skaffar McLaren liðinu vélar.

Honda hefur setið undir gríðarlegri gagnrýni vegna þess hversu óáreiðanlegar og afllitlar vélar framleiðandas eru. Honda hefur lofað úrbótum í þrjú ár og lítið gerst. Nú segist liðið vera alveg við það að ná risastóru framfararskrefi.

„Við munum halda okkur við efnið svo aðdáendur okkar munu sjá Honda með drottnandi afl sem allra fyrst,“ sagði Katsuhide Moriyama, vörumerkjastjóri Honda.

„Þetta er mikill heiður fyrir Sauber F1 liðið. Við hlökkum til samstarfsins við Honda, sem setur okkur á rétta braut til framtíðar. Við viljum þakka Honda fyrir að taka þátt í því,“ sagði Monisha Kaltenborn, liðsstjóri Sauber liðsins.

Sauber liðið notast nú við Ferrari vélar síðasta árs, það þýðir að vélin mun ekki þróast neitt allt tímabilið. Þegar einungis eitt lið er með ársgamla hönnun þá mun það lið væntanlega dragast hratt aftur úr þegar aðrar vélar halda áfram að þróast.

Honda hefur ekki átt góðu gengi að fagna eftir að framleiðandinn kom aftur inn í Formúlu 1 árið 2015. Vélin hefur frá fyrstu æfingum 2015 þótt afllítil og óáreiðanleg. Kannski er það að fara að breytast. Honda mun hafa tækifæri til að læra tvöfalt hraðar á næsta ári, þegar annað lið hefur að nota vélarnar.