Sakfelld fyrir að sparka í andlitið á leigusalanum

Kona á þrítugsaldri var í Héraðsdómi Reykjavíkur í gær dæmd í tíu mánaða skilorðsbundið fangelsi fyrir líkamsárás og fíkniefnalagabrot. Henni var gefið að sök að hafa sparkað í andlitið á leigusala sínum og að hafa haft í fórum sínum rúm þrjú grömm af maríjúna.

Öskraði eins og dýr

Kærasti konunnar hafði tekið herbergi á leigu á gistiheimili við Grjótagötu í Reykjavík í janúar 2015. Leigusalinn sagði kærasta konunnar hafa leitað til sín og sagst vera í vandræðum með húsnæði í tvær vikur, og að hann hafi þar af leiðandi útvegað manninum herbergi.

Hann sagði manninn hafa verið eina nótt einn í herberginu en að konan hafi komið næsta dag. Þá hafi allt farið í háaloft; hávaði, rifrildi, skellir og slæm umgengni. Leigusalinn sagði það ekki ganga upp og bað þau um að fara.

Þegar konan hafi neitað að afhenda lykilinn að herberginu hafi komið til átaka á milli sín og hennar. Hann sagði hana hafa reynt að bíta sig í höndina og svo sparkað í andlit sitt þegar hann teygði sig eftir lyklinum, með þeim afleiðingum að hann missti tvær tennur. Hún hafi svo gengið niður Aðalstrætið “öskrandi eins og dýr”, líkt og leigusalinn orðaði það fyrir dómi.

Áverkarnir væntanlega eftir fall

Konan sagðist hins vegar hafa verið að hlaupa undan leigusalanum og að þau hefðu fallið í jörðina. Áverkar hans hefðu væntanlega verið eftir það. Þá sagði hún manninn hafa ráðist á sig - ekki öfugt. Læknir sem skoðaði manninn taldi langlíklegast að áverkarnir hefðu komið við spark í andlitið og þá taldi tannlæknir áverkana varla geta komið til við að falla eða hrasa.

Dómurinn taldi sannað að konan hefði gerst sek um þessa háttsemi og dæmdi hana í tíu mánaða skilorðsbundið fangelsi til tveggja ára. Þá var henni gert að greiða leigusalanum 500 þúsund krónur í miskabætur og rúma milljón í tannlæknakostnað mannsins.