Veittist að fjögurra ára syni sínum sem neitaði að taka vítamínin

Fertugur karlmaður var í Héraðsdómi Reykjavíkur í gær dæmdur í sjö mánaða skilorðsbundið fangelsi fyrir sérstaklega hættulega líkamsárás gagnvart fjögurra ára syni sínum í júní í fyrra. Honum var gert að greiða 400 þúsund krónur í miskabætur. Maðurinn hefur margsinnis hlotið fangelsisdóma.

Manninum var gefið að sök að hafa tekið drenginn kverkataki í því skyni að fá drenginn til þess að taka inn vítamíntöflu. Barnið hlaut marbletti framan á háls, punktblæðingar í andlit og grunn rifsár framan á brjóstkassa.

Ljótir áverkar á hálsi

Leikskóli barnsins gerði Barnavernd Kópavogsbæjar viðvart um áverkana. Deildarstjórinn greindi frá því fyrir dómi að maðurinn hefði borið sig illa þegar hann kom með drenginn á leikskólann á mánudagsmorgni. Hann hafi greint frá því að drengurinn hefði verið erfiður alla helgina, hann hefði misst stjórn á sér og lagt hendur á barnið þegar hann ætlaði að gefa því vítamín. Hann hafi verið harðhentur og væri miður sín.

Deildarstjórinn sagðist hafa rætt við manninn um aðrar leiðir til að takast á við erfiða hegðun, en á þeim tíma hafði hún ekki séð drenginn. Henni hafi hins vegar brugðið þegar hún hitti barnið og sagði áverkana á hálsi þess ljóta. Leikskólastjóri hafði í framhaldinu haft samband við barnavernd og hófst lögreglurannsókn í framhaldinu.

Játaði sök að hluta

Faðir drengsins viðurkenndi að hafa veist að barninu og valdið áverkum á hálsi. Hann sagðist hins vegar ekki kannast við að sárin á brjóstkassa barnsins hafi verið af hans völdum.

Maðurinn sagðist hafa í tvígang á árum áður fengið heilablóðfall og í janúar í fyrra fengið hjartaáfall. Hann hafi ekki jafnað sig eftir þau veikindi og að þau hefðu meðal annars haft þau áhrif að hann skorti talsvert upp á allar fínhreyfingar. Þá hafi hann verið undir miklu álagi á þessum tíma.

Maðurinn sagðist hafa verið að reyna að gefa barninu vítamíntöflu þegar atvikið átti sér stað. Barnið hafi hins vegar ekki viljað taka töfluna og því hafi hann gripið til þess ráðs að taka undir höku drengsins með annarri hendi og lyft henni upp.

Um leið hafi hann, sennilega án þess að átta sig á því, lokað fyrir háls barnsins þannig að drengurinn kom töflubrotunum ekki niður. Hann hafi hins vegar ekki tekið um háls hans. Hann gæti illa útskýrt hegðun sína á annan veg en að hann hafi verið í einhvers konar vægu taugaáfalli.

Drengurinn sýndi ítrekað hvernig faðir hans hefði tekið hann kverkataki með annarri hendi og ýtt aftan á háls hans. Að mati læknis samrýmast áverkarnir þessari lýsingu barnsins.

Margsinnis hlotið dóma

Faðirinn fékk ekki að hitta barnið nema undir eftirliti í kjölfarið. Hann er fæddur árið 1978 og á að baki talsverðan sakaferil og hefur margsinnis hlotið fangelsisdóma.

Dómurinn taldi háttsemi hans einkar hættulega. Hins vegar sé litið til þess að brotið hafi haft mikil áhrif á manninn sem iðrist mjög gerða sinna. Í ljósi þess hvaða afleiðingar brotið hafði á manninn og að þess að barnið á lögum samkvæmt rétt á umgengni við föður sinn, var ákveðið að skilorðsbinda refsinguna.

Refsingin var skilorðsbundin til tveggja ára og var manninum gert að greiða móður drengsins, þar sem hann er ólögráða, 400 þúsund krónur í miskabætur. Þá var honum gert að greiða rúmar tvær milljónir í sakar- og lögfræðikostnað.