Sex menn handteknir af sérsveitinni

Sex karlmenn voru handteknir í aðgerðum sérsveitar ríkislögreglustjóra í austurborginni í nótt og eru fjórir þeirra grunaðir um rán sem framið var laust eftir miðnætti.

Fjórmenningunum er gefið að sök að hafa hótað karlmanni með eggvopni og tekið af honum iPhone7 síma, kortaveski og peninga. Þeir hafi síðan hlaupið á brott.

Skömmu eftir ránið fór lögregla og sérsveitin inn í íbúð í austurborginni. Þar voru sex karlmenn og voru þeir allir fluttir á lögreglustöðina við Hverfisgötu. Tveir voru látnir lausir eftir skýrslutöku en fjórir verða vistaðir lengur vegna rannsóknarinnar.