Hlaut höfuðáverka en neitaði að fara á slysadeild

Lögregla var kölluð að heimahúsi í Grafarvogi laust eftir miðnætti í nótt vegna heimilisofbeldis. Þar hafði manneskja hlotið höfuðáverka en neitaði að fara á slysadeild til aðhlynningar, þegar lögregla óskaði eftir því.

Sá sem grunaður er um árásina hafði yfirgefið heimilið þegar lögreglu bar að garði. Í skeyti frá lögreglu segir að talið sé að maðurinn hafi verið talsvert drukkinn.

Þá var sömuleiðis tilkynnt um heimiliserjur í Hafnarfirði í gærkvöldi. Í ljós kom að um minniháttar ágreining var að ræða og ekki kom til neinna átaka, að því er segir í tilkynningunni.