Börsungar kvöddu Enrique með þriðja bikarmeistaratitlinum í röð

Barcelona varð í kvöld spænskur meistari þriðja árið í röð eftir 3-1 sigur á Alavés í úrslitaleik á Vicente Calderón í kvöld. Þetta er jafnframt í 29. sinn sem Barcelona verður bikarmeistari sem er met.

Lionel Messi kom Barcelona yfir eftir hálftíma leik en aðeins þremur mínútum síðar jafnaði Theo Hernández, lánsmaður frá Atlético Madrid, metin fyrir Alavés.

Neymar kom Börsungum aftur yfir á lokamínútu fyrri hálfleiks og í uppbótartíma jók Paco Alcácer muninn í 3-1. Hann skoraði þá eftir magnaðan sprett og sendingu Messi.

Seinni hálfleikurinn var öllu rólegri og mörkin urðu ekki fleiri. Lokatölur 3-1, Barcelona í vil.

Þetta var síðasti leikur Barcelona undir stjórn Luis Enrique sem er að hætta með liðið eftir þriggja ára starf.