Klósettskál í Ólafsvík vekur mikla athygli

Klósettskál sem tekin hefur verið og fest við stóran stein í Ólafsvík hefur vakið mikla athygli og keppast túristar við að taka myndir af þessu listaverki.

Höfundur verksins er Vilberg Ingi Kristjánsson pípulagningameistari en hann segir þetta grín sem er þannig til komið að haldin var Ólafsvíkurvaka um daginn. Og fólk skreytti hverfi sín í tilefni hátíðarinnar. „Ég er pípari, var að skipta um klósettskál heima hjá mér og dúndraði þeirri gömlu bara á steininn,“ segir Vilberg Ingi léttur í bragði. „Orange var litur hverfisins og ég málaði skálina í þeim lit.“

Píparinn segir að ferðamenn sem eigi leið þar um keppist við að mynda þetta verk sem óneitanlega minnir nokkuð á verk Marcel Duchamps dadaista sem breytti listasögunni þegar hann tók klósettskál úr sínu samhengi, kallaði The Fountain og sýndi sem listaverk í galleríi.

„Jájá,“ einmitt segir Vilberg Ingi. Og neitar því ekki að þarna sé vísun í vandræðagang í tengslum við salernisaðstöðu á Íslandi og svo ferðamannastrauminn. Að þetta sé einskonar háðsádeila. „Það var aðeins uppá það líka. En, það hefur enginn lagt í að prófa þetta.“