Real Madrid vann Barcelona aftur og 5-1 samanlagt

Real Madrid er meistari meistaranna á Spáni eftir 2-0 sigur á Barcelona í kvöld í Súperbikarnum á Spáni.

Real Madrid vann því báða leiki liðanna og 5-1 samanlagt en leikurinn í kvöld fór fram á heimavelli Real Madrid.

Spænsku meistararnir og spænsku bikarmeistararnir mætast í þessum árlegu viðureignum en spilað er á heimavöllum beggja liða. Þetta er í tíunda sinn sem Real Madrid vinnur Súperbikarinn á Spáni en Barceona vann hann í tólfta sinn í fyrra. Real-menn höfðu ekki unnið hann frá 2012.

Real Madrid var í frábærri stöðu eftir 3-1 sigur á Barcelona á Nývangi um síðustu helgi og kláruðu dæmið snemma í kvöld með því að komast í 1-0 eftir aðeins fjögurra mínútna leik.

Marco Asensio skoraði markið með laglegu skoti en hann skoraði einnig í fyrri leiknum. Karim Benzema bætti síðan við öðru marki sex mínútum fyrir hálfleik.

Cristiano Ronaldo var fjarri góðu gamni í kvöld eftir rauða spjaldið í fyrri leiknum en það skipti ekki máli. Zinedine Zidane gat líka leyft sér að hvíla þá Gareth Bale og Isco á bekknum.

Lucas Vázquez, Karim Benzema og Marco Asensio voru í þriggja manna framlínu liðsins og tveir af þeim skoruðu.

Þetta er enn einn bikarinn sem Zinedine Zidane vinnur sem þjálfari Real Madrid en þeir eru núna orðnir sjö talsins.