Ice Cube vann LaVar Ball í skotkeppni | Myndband

Körfuboltapabbinn sem fólk elskar að hata, LaVar Ball, stendur sjaldnast við stóru orðin og tapaði í skotkeppni fyrir rapparanum og leikaranum Ice Cube. Ái.

Ball elskar að rífa kjaft og ögra fólki. Hann sagðist meðal annars geta unnið Michael Jordan í einn á einn en náði ekki einu sinni að vinna Ice Cube í skotkeppni.

Þetta var svokölluð fjögurra stiga skotkeppni og er hluti af Big3 League sem er á vegum Ísmolans.

Cube skoraði LaVar á hólm og lofaði að kaupa af honum tíu pör af Big Baller Brand skóm ef hann tapaði. Það eru líklega dýrustu íþróttaskór sem hægt er að fá í dag.

Ísmolinn bráðnaði ekki undir pressu heldur kláraði skotkeppnina gegn Ball sem stendur ekki undir eigin yfirlýsingum líkt og áður.