Januzaj: Ætla að tileinka Van Gaal fyrsta markið mitt

Adnan Januzaj segir að hann muni tileinka Louis van Gaal fyrsta markið sem hann skorar fyrir Real Sociedad.

Januzaj fékk fá tækifæri hjá Manchester United á meðan Van Gaal var við stjórnvölinn hjá liðinu. Hann segir að samstarf þeirra hafi gengið erfiðlega.

„Ef ég skora mark mun ég tileinka Van Gaal það,“ sagði Januzaj í samtali við AS.

„Ég vil ekki tala um hann en það vita allir um vandamálin í samstarfi okkar. Þetta var ekki auðvelt, það er mjög svekkjandi og erfitt þegar þú ert í svona stöðu,“ bætti Januzaj við.

Belginn sýndi góða takta á fyrsta og eina tímabilinu sem David Moyes stýrði United en náði ekki að fylgja því eftir. Tækifærunum fækkaði óðum og fyrri hluta tímabilsins 2015-16 var Januzaj lánaður til Borussia Dortmund.

„Ég fékk ekki mörg tækifæri til að spila. Ég eyddi miklum tíma á bekknum og við það hverfur sjálfstraustið og minni háttar meiðsli fara að láta á sér kræla,“ sagði Januzaj um Van Gaal-tímann.

„Ég byrjaði ekki oft og það er erfitt að blómstra í þannig aðstæðum. Stjórinn setti mig í stöður sem ég kunni ekki að spila. Einn daginn get ég vonandi þaggað niður í gagnrýnisröddunum.“

Januzaj var seldur til Sociedad fyrir átta milljónir punda í sumar.