Íslenska liðið rétt slapp með skrekkinn í fyrri leiknum við finnska liðið og Finnar eru sýnd veiði en ekki gefin.
„Við ætlum að reyna að fá ekki á okkur mörk sem við gerðum síðast. Við fengum á okkur tvö mörk á móti Finnum sem er ekki okkur líkt. Það er það fyrsta sem við þurfum að bæta. Síðan þurfum við að halda okkar striki og gera það sem við erum góðir í að gera. Við vitum að við skorum alltaf og ef við höldum hreinu þá ætti þetta að vera í traustum höndum,“ segir Ragnar sem segir finnska liðið geta strítt íslenska liðinu.
„Þetta verður ekki auðveldur leikur. Mér hefur alltaf fundist Finnarnir vera erfiðir. Þeir eru duglegir, pirrandi og góðir í fótbolta. Þetta verður erfitt,“ segir Ragnar.
Íslenska liðið á eftir fjóra leiki og er eins og er í öðru sæti riðilsins á verri markatölu en topplið Króata. Íslenska liðið hefur unnið báða leiki sína í riðlinum á árinu 2017, þann fyrri í Kosóvó í mars og þann seinni á móti Króötum í Laugardalnum í júní.
„Við erum akkúrat á þeim stað sem við ætluðum okkur að vera á þessum tíma sem var að eiga möguleika á að vinna riðilinn. Við lítum á þessa tvo næstu leiki sem leiki sem við eigum að vinna. Íslenska landsliðið er bara orðið svoleiðis. Við búumst við sigri,“ segir Ragnar og bætir við.
„Finnarnir eru lið í dag sem við eigum að vinna. Svo eigum við heimaleik á móti Úkraínu. Úkraína á að vera sterkara lið heldur en bæði við og Finnar. Við vitum hins vegar hvað við erum góðir á heimavelli. Við erum að fara í þetta til að vinna,“ segir Ragnar.
Í frábæru formi
Ragnar er nú aftur kominn til Rússlands eftir misheppnað tímabil með Fulham í ensku b-deildinni. Fulham lánaði hann til Rubin Kazan.
„Staðan á mér er frábær. Ég er kominn til Rubin og ég sá það strax að ég átti að fara beint inn í liðið. Svo meiddi ég mig á fyrstu æfingu og missti af þremur leikjum af því að ég var smá meiddur. Ég spilaði í hálftíma í þar síðasta leik og spilaði allan leikinn síðast. Ég er í formi og það er ekkert hægt að setja út á formið á mér,“ segir Ragnar sposkur en það var mikið til umræðu í síðasta landsleik á móti Króatíu.
Sigurmark Ragnars í fyrri leiknum á móti Finnum á Laugardalsvellinum kom á sjöttu mínútu í uppbótartíma. Fyrir vikið vann íslenska liðið sinn fyrsta leik í undankeppninni og fékk þrjú dýrmæt stig í hús. Án þeirra væri íslenska í fjórða sæti riðilsins í stað þess að vera við hlið Króata á toppnum.
„Við vorum bara svolítið heppnir á móti Finnunum eins og við höfum talað áður um. Markvörðurinn þeirra átti samt bara einn besta leik sem ég hef séð markmann spila. Hann varði og varði allan leikinn. Við hefðum getað verið búnir að skora fleiri mörk áður en við skoruðum þessi tvö mörk í endann. Stundum þurfa miðverðirnir að hjálpa til fram á við,“ sagði Ragnar brosandi.
Hann fer ekkert í felur þegar talið berst að tímabilinu með Fulham sem voru vonbrigði fyrir mann sem hafði slegið í gegn á EM í Frakklandi sumarið áður.
„Ég hef haft rosalega mikinn tíma til að hugsa um þetta. Ég sé það bara að þetta var alfarið sjálfum mér að kenna. Ég tók þetta ekki alveg nógu alvarlega þegar ég kom þarna,“ sagði Ragnar og hlífir ekki sjálfum sér.
„Eftir EM þá var maður svolítið hátt uppi og ég hugsaði bara að ég gæti komið þarna og rúllað þessu upp án þess að reyna alltof mikið á mig eða eitthvað. Ég lít þannig á það að þetta hafi alfarið verið mín sök,“ sagði Ragnar og bætti við:
„Í endann hafði þjálfarinn enga trú á mér lengur. Það var ekki honum að kenna heldur bara sjálfum mér. Maður verður að líta raunsætt á þetta því það þýðir ekki að fara að blekkja sjálfan sig í algjöru bulli,“ sagði Ragnar hreinskilinn að lokum.
