Hamilton: Mercedes vélin er greinilega betri en Ferrari vélin

Lewis Hamilton á Mercedes kom sér fram fyrir Sebastian Vettel í heimsmeistarakeppni ökumanna í dag i fyrsta skipti á timabilinu. Hver sagði hvað eftir keppnina?

„Ég elska ástríðuna fyrir Formúlu 1 hérna á Ítalíu. Liðið stóð sig vel í dag. Mercedes vélin er greinilega betri en Ferrari vélin, það sýndi sig hér um helgina. Ég held að munurinn á Mercedes og Ferrari sé aðallega liðið og samvinna þess,“ sagði Hamilton eftir keppnina. Hann varð með sigrinum fyrstur til að vinna tvær keppnir í röð á tímabilinu.

„Ræsingin var flókin enda lítið grip. Bíllinn var svo öflugur í dag að það var gott að taka fram úr og ekkert drama hjá mér í dag,“ sagði Valtteri Bottas á Mercedes sem varð annar.

„Þetta var skemmtileg byrjun, ég átti slaka ræsingu og spólaði mikið. Við vorum ekki með sama hraða og Mercedes í dag en það var gaman að vinna sig upp listann,“ sagði Vettel sem var einkar vel tekið á verðlaunapallinum. Enda Tifosi, aðdáendur Ferrari liðsins á svæðinu.

„Ég var að nálgast verðlaunapall og sótti hratt að Sebastian undir lokin. Það vantaði bara ögn upp á. Ég skal gefa Raikkonen mikið í þessu hann ók sanngjarnan akstur. Ég var mjög glaður að ná þeim framúrakstri. Við munum hringa alla í Singapúr,“ sagði Daniel Ricciardo í léttum tón. Hann ræsti 18. en endaði fjórði á Red Bull bílnum í dag. Hann átti einnig hraðasta hring dagsins.

„Keppnin mín var búin frekar snemma. Mér finnst þetta ekki hafa verið eittvað atvik með Kevin Magnussen. Vonandi getum við barist um verðlaunapall í Singapúr,“ sagði Max Verstappen sem varð tíundi á Red Bull bílnum í dag.

„Ég hef aldrei séð neitt þessu líkt. Bilið í Vettel, 36 sekúndur er ótrúlegt. Liðið er í toppformi þessa dagana. Við erum með fljótasta liðið á heildina litið,“ sagði Niki Lauda, fyrrum heimsmeistari í Formúlu 1 og sérstakur ráðgjafi Mercedes liðsins.

„Ég var að vona að Lewis myndi eiga betri ræsingu svo ég gæti einbeitt mér að því að halda öðru sætinu. Það var því miður ekki þannig. Þar að auki kom þjónustuhléð sér ekki að góðu. Það var tvöfalt lengra en venjulega. Lewis hefur verið stressaður að ræsa við hliðina á mér í dag,“ sagði Lance Stroll í léttum tón sem varð sjöundi í dag á Williams bílnum.

„Við Sergio snertumst í fyrstu beygju og svo snertumst við Max seinna og svo rákumst við liðsfélagarnir saman en þar gerðist ekkert svo það er í góðu lagi,“ sagði Felipe Massa sem varð áttundi í dag á Williams bílnum.