110 sm lax úr Vatnsdalsá

Stóru hængarnir eru greinilega komnir á stjá miðað við þær fréttir sem við erum að fá úr þeim ám sem frægar eru fyrir stórlaxa.

Í gærkvöldi kom 111 sm lax úr Laxá í Aðaldal af Nessvæðinu og sama kvöld var verið að landa 110 sm laxi í Vatnsdalsá.  Fram að þessu var stærsti laxinn í sumar 109 sm lax sem veiddist tvisvar í Hofsá svo það eru alla vega tveir laxar staðfest komnir yfir hann í stærð.  Laxinn sem kom á land í Vatnsdalsá í gærkvöldi af Elíasi var eins og áður segir 110 sm langur og veiddist í Gilsárós á Rauða Frances cone 1/4".  

Heildarveiðin í Vatnsdalsá er komin í 634 laxa sem er nokkuð undir veiðinni í fyrra en þá veiddust 853 laxar.  Frá árinu 1974 hefur áinn 14 sinnum farið yfir 1000 laxa og er með meðaltalsveiði um 700-800 laxa.  Besta veiðin í henni var árið 1986 þegar það veiddut 1582 laxar en lélegasta árið hennar var árið 2000 þegar aðeins veiddust 323 laxar í henni.