G-bletturinn á Hlíðarenda er kominn í sölu

Reykjavíkurborg hefur auglýst atvinnuhúsnæði við Haukahlíð 3, sem er nefnd lóð G í skipulagi. Heimilt er að byggja allt að 17.500 fermetra atvinnuhúsnæði á 3-4 hæðum, auk bílgeymslu í kjöllurum.

Í tilkynningu frá borginni kemur fram að lóðin sé byggingarhæf og lóðarhafa beri að taka þátt í lóðarfélagi annarra lóðarhafa á Hlíðarendasvæðinu vegna sameiginlegs kostnaðar við framkvæmdir sem fellur til eftir úthlutun lóðarinnar. Fjórða hæðin má þekja allt að 50% af flatamáli 3.hæðar. Jarðhæð er inndregin um 150 cm á suður-og vesturhlið reits.

Heimilt er að byggja svalir og útbyggingar á 30% hverrar hliðar út um 100 cm til að brjóta upp hliðar, að öðru leyti eru svalir innan reits. Þök skulu samkvæmt skipulagi vera grasi lögð og flöt, að hámarki 5°. Öll bílastæði (1 á hverja 100 m²) skulu vera innan lóðar. Gera má ráð fyrir tveggja hæða bílgeymslukjallara. Bílastæði á borgarlandi eru samsíða stæði í götu. Athuga skal að hæðarmunur í lóð getur verið 1-2 m og skal bygging stallast í takt við það. Staðsetning innkeyrslu í bílgeymslu er frjáls.

Skila skal skriflegu kauptilboði á tilboðsblaði í lokuðu umslagi merkt “Haukahlíð 3”  til Þjónustuvers Reykjavíkurborgar Borgartúni 12-14, fyrir kl. 14:00  miðvikudaginn 11. október 2017.  Tilboð verða opnuð sama dag kl. 14.15 að viðstöddum þeim bjóðendum sem þess óska.