Bjarni seldi í Sjóði 9 sama dag og neyðarlögin voru sett

Bjarni Benediktsson, þáverandi þingmaður og nú forsætisráðherra, seldi allar eignir sínar í Sjóði 9 hjá Glitni dagana 2. til 6 október 2008, skömmu fyrr bankahrun. Bjarni hafði á þessum tíma, vegna stöðu sinnar sem þingmaður, aðgang að upplýsingum um raunverulega stöðu Glitnis eftir að hafa setið fundi um alvarlega stöðu bankakerfisins. Alls seldi Bjarni bréf í Glitni fyrir um 120 milljónir króna eftir að hafa fundað með bankastjóra Glitnis.

Þetta er meðal þess sem kemur fram í nýjasta tölublaði Stundarinnar þar sem fjallað eru um viðskipti Bjarna Benediktssonar, föður hans og föðurbróður, dagana fyrir hrun bankakerfisins.

Þar er því jafnfram haldið fram að 6. október, sama dag og þáverandi forsætisráðherra Geir H. Haarde, bað Guð um að blessa Ísland hafi Bjarni miðlað upplýsingum um vinnu Fjármálaeftirlitsins í aðdraganda bankahrunsins til framkvæmdastjóra hjá Glitni, sem er vinur hans. Faðir Bjarna, Benedikt Sveinsson, og föðurbróðir hans, Einar Sveinsson, seldu einnig í Sjóði 9 dagana fyrir bankahrunið 2008 eins og greint var frá í Fréttablaðinu í desember í fyrra.

Í samtali við Heimi Má Pétursson í þættinum Víglínunni í desember í fyrra gekkst Bjarni við því að hafa átt í Sjóði 9 og selt eitthvað sjóðnum dagana fyrir bankahrunið. Hann sagðist þó ekki reka minni til að það hefðu verið upphæðir sem hafi „skipt einhverju máli.“ Virði bréfanna sem hann seldi dagana fyrir hrun námu um 50 milljónum, er fram kemur í umfjöllun Stundarinnar.

Þáttinn má sjá hér að neðan.

Í umfjölluninni eru jafnframt rakin tengsl Bjarna og Glitnis. Kemur þar meðal annars fram að Bjarni hafi verið skráður í fimm boðsferðir á vegum bankans á árunum fyrir hrun. Fjórar þeirra voru utanlandsferðir en sú fimmta veiðiferð að Langá á Mýrum.

Upplýsingarnar sem Stundin byggir umfjöllun sína á koma fram í gögnum innan úr Glitni sem blaðið segist hafa undir höndum og vinni í samstarfi við Reykjavik Media og breska blaðið Guardian.

Í þessum gögnum kemur jafnframt fram að Bjarni hafi notið mikillar velvildar hjá bankanum og hafi ítrekað fengið boð í ferðir á vegum bankans. Rannsóknarnefnd Alþingis fjallaði um eina þessara ferða og Bjarni hefur sjálfur sagt tvívegis hafa þegið slíkt boð. 

Í samtali við blaðamann Guardian segist Bjarni ekki hafa búið yfir neinum innherjaupplýsingum á þessum tíma sem um ræðir. Sölur hans í Sjóði 9 hafi þar að auki verið rannsakaðir og ekkert úr þeim komið. „Allir skynsamir fjárfestar hefðu verið að íhuga að selja á þesum tíma.“ Bjarni vildi í viðtalinu við blaðamann Guardian ekki gefa upp nákvæmar upplýsingar um tímasetningar og upphæðir í málinu.

Umfjallanir Stundarinnar má nálgast hér:

Seldi í Sjóði 9 sama dag og neyðarlögin voru sett

„Bjarni ben segir að fme séu á skrilljón að vinna í þessu“

Benedikt var leystur undan sjálfskuldarábyrgð skömmu fyrir þjóðnýtingu Glitnis