Varað við staðbundinni og mjög lúmskri ísingu

Varað er við staðbundinni og mjög lúmskri ísingu, einkum vestanlands í kvöld og nótt. Þetta kemur fram í tilkynningu frá Vegagerðinni en þar segir að skýjabólstrar með smágerðu regni komi af hafi, en á milli þeirra létti til þar sem vegyfirborðið kólnar hratt og ísing myndast.

Á þetta einkum við um Vesturlandsveg og í Borgarfirði og norður yfir Holtavörðuheiði sem og aðra vegi vestanlands einkum til landsins. Einnig mögulega í uppsveitum Suðurlands, í grennd við Höfuðborgarsvæðið og almennt í Borgarfirði og á Mýrum.