Kári og félagar halda í við topplið Celtic

Kári Árnason lék allan leikinn í 1-0 sigri Aberdeen gegn Hibernian á útivelli í skosku úrvalsdeildinni í dag en Aberdeen er enn án ósigurs eftir níu umferðir.

Kári sem lék báða leiki Íslands á dögunum var á sínum stað í miðri vörn skoska liðsins og lék allan leikinn í dag.

Gary Mackay-Steven skoraði eina mark leiksins í dag en þetta var fyrsta mark hans fyrir Aberdeen eftir félagsskipti frá Celtic fyrr í sumar.

Var þetta sjöundi sigur Aberdeen sem hefur einnig gert tvö jafntefli í fyrstu níu umferðunum en þessi tvö lið mætast á miðvikudaginn 25. október.