Ferðamenn óánægðari með Ísland

Ferðamenn eru óánægðari með ferðina til Íslands nú í sumar miðað við í fyrra. Ferðamannapúls Gallup hefur lækkað marktækt en hann mælir heildaránægju og heildarupplifun ferðamanna á heimsókn þeirra til Íslands. Ánægja Breta og Norðmanna hefur lækkað mest en rússneskir ferðamenn eru ánægðastir með ferðina til Íslands.

Það sem spilar mest inn í lækkunina er óánægja með verðlag hér á landi.

Á vef Gallup, þar sem finna má upplýsingar um Ferðamannapúlsinn, segir að fyrir sumarið hafi púlsinn verið 2,5 stigum lægri heldur en í fyrra. Til ágúst hefur hann mælst lægri í öllum mánuðum ársins miðað við sömu mánuði síðasta árs.



Ánægja Rússa með Íslandsferð þeirra var 87 stig í sumar og er það nokkuð hærra en hjá Ítölum, sem voru í öðru sæti með 84,2 stig.

Þá mældist púlsinn eingöngu 79,8 stig hjá frændum okkar frá Noregi og 80,2 stig hjá Bretum.