Ágætis haustveður um helgina

Veðurstofan gerir ráð fyrir talsverðri eða mikilli rigningu á Austfjörðum fram undir hádegi og má búast við vatnavöxtum ásamt auknum líkum á skriðuföllum. Þrátt fyrir það má búast við fallegu veðri um helgina. Þó ætti fólk að varast hálkuna.

Það hefur rignt mikið austanlands síðdegis í gær og í nótt. Nú í morgunsárið hefur dregið úr rigningunni á Suðausturlandi en enn mun rigna mikið á Austfjörðum fram undir hádegi. Síðdegis léttir hins vegar til.

„Sjálfvirkir úrkomumælar eru nokkrir á svæðinu og þegar þetta er skrifað hefur mest safnast í mælinn á Neskaupstað eða rúmlega 100 millimetrar frá því úrhellið hófst þar uppúr hádegi í gær. Á sama tíma hafa mælst um 90 mm á Fáskrúðsfirði,“ útskýrir veðurfræðingur Veðurstofunnar.

Suðlæg átt er í kortunum í dag og einhver væta „nokkuð víða.“ Vindurinn og úrkoman minnkar þegar líður á daginn og í kvöld verður búið að stytta upp og komið hæglætisveður um allt land. Vegir verða margir blautir eftir daginn og í kvöld og nótt verður semsagt hægur vindur, það rofar til og kólnar.

Vegfarendur ættu því að vera á varðbergi gagnvart hálku að sögn veðurfræðings. Þá er útlit fyrir „rólegheit“ og „alveg ágætis haustveður“ um helgina - „og því upplagt að njóta útivistar.“

Veðurhorfur á landinu næstu daga

Á laugardag:

Hæg norðlæg eða breytileg átt, með þurru veðri og yfirleitt bjart sunnan heiða. Norðan 5-10 m/s dálítil rigning austanlands síðdegis. Hiti 3 til 8 stig yfir daginn.

Á sunnudag:

Austan og norðaustan 3-8 og dálítil væta, en þurrt um landið vestanvert. Bætir í vind um kvöldið. Hiti breytist lítið.

Á mánudag:

Austan 8-15 m/s, en heldur hægari síðdegis. Talsverð rigning suðaustantil, en rigning með köflum í öðrum landshlutum. Hiti 5 til 10 stig.

Á þriðjudag:

Norðaustan 3-10, en 10-15 á Vestfjörðum. Dálítil rigning af og til, en bjartviðri suðvestanlands. Hiti svipaður.

Á miðvikudag og fimmtudag:

Norðaustlæg átt með svolítilli vætu fyrir norðan og austan, en bjart sunnan heiða. Hiti 3 til 8 stig.