Segir eineltismálið prófstein á Húsavík

Forseti sveitarstjórnar Norðurþings segir eineltismálið á Húsavík vera prófsteinn á það hvernig samfélag bærinn vilji vera. Á málinu þurfi að taka. Einelti sé landlægt vandamál sem kunni að virka stærra á þolanda í litlu samfélagi eins og Húsavík: „þar sem honum finnst eins og allt samfélagið sé gerandi eða óvirkur þátttakandi, þegar raunin er að fæstir vita af því sem á sér stað.“

Vísir hefur fjallað ítarlega um mál sextán ára stúlku á Húsavík sem lögð hefur verið í gróft einelti í átta ára. Líðan hennar varð svo slæm að á dögunum reyndi hún að svipta sig lífi.

Foreldrar stúlkunnar, Sigrún Birna Árnadóttir og Almar Eggertsson, stigu því fram og tjáðu sig opinberlega um sjálfsvígstilraunina og eineltið til þess að vekja bæjarbúa til umhugsunar - síðast í gærkvöldi.

Sjá einnig: Sigrún og Almar þakka stuðninginn: „Undanfarnir dagar hafa verið afskaplega dýrmætir“

Það segir forseti sveitarstjórnarinnar, Örlygur Hnefill Örlygsson, til marks um ótrúlegt hugrekki af hálfu foreldranna.

„Einlæg frásögn þeirra vakti athygli um land allt. Því miður, en nokkuð fyrirsjáanlega, framkallaði það hins vegar viðbrögð sem einnig eru ofbeldi. Fjöldi fólks víðs vegar um landið steig fram til að fordæma alla íbúa Húsavíkur og orð voru rituð sem var hálf lamandi að lesa. Orð sem munu lifa á netinu um langa tíð,“ skrifar Örlygur í grein sem birtist í Fréttablaðin í morgun.

Honum sárnar að hið „hið mikla og vandaða starf“ sem unnið sé í skóla stúlkunnar hafi verið gert að engu með þessum ummælum. Þegar slíkt gerist eigi samfélög til að fara í vörn að mati Örlygs.

„Þannig skapar sú ljóta umræða sem á sér stað á samfélagsmiðlum gjá milli þolandans og þess samfélags sem þarf að skerast í leikinn og þolandinn er að kalla til. Samfélagið hér er enn frekar en önnur samfélög í vörn vegna atburða úr fortíðinni.“

Því næst reifar hann þá stefnu sem er í gildi í skólum Húsavíkur. Að mati Örlygs tekst stefnunni oftast að uppræta eineltismálin sem koma upp- „en því miður ekki alltaf.“

„Nú stöndum við aftur frammi fyrir máli sem samfélagið okkar þarf að taka á. Hvernig við tökum á því mun segja mikið um hvernig samfélag við höfum skapað og hvernig samfélag við viljum vera,“ segir Örlygur í greininni sem nálgast má hér.