Hvasst í morgunsárið

Dagurinn byrjar á allhvassri eða hvassri norðlægri átt suðaustan- og austanlands að sögn Veðurstofunnar en mun hægari vindur verður annars staðar.

Hviður við fjöll geta farið yfir 30 m/s á þessu svæði og nefnir Veðurstofan einkum suðurhluta Vatnajökuls og sunnanverða Austfirði í þessu samhengi. Vindurinn á að ganga síðan nokkuð hratt niður um hádegi.

Það má búast við stöku éljum norðaustantil fram eftir degi, en léttskýjuðu veðri á Suður- og Vesturlandi. Hiti víða um frostmark en upp í 6 stig með suðurströndinni.

Það snýst svo í suðlæga átt í kvöld og verður hún hvöss í nótt um landið norðan og norðvestanvert og rignir víða. Hún snýst svo í suðvestanátt á morgun með skúrum og hlýnar heldur, en úrkomulítið norðaustanlands. Hiti 2 til 7 stig.

Veðurhorfur á landinu næstu daga

Á fimmtudag:

Suðvestan 8-15 m/s og rigning eða jafnvel slydda, einkum til fjalla, en úrkomulítið NA- og A-lands. Hægari um kvöldið. Hiti 2 til 7 stig að deginum.

Á föstudag:

Hægt vaxandi norðaustanátt og él við N-ströndina, 8-15 m/s um kvöldið. Hæg breytileg átt í öðrum landshlutum fram eftir degi og stöku skúrir eða slydduél. Hiti nálægt frostmarki.

Á laugardag:

Norðan 5-13 og dálítil él N- og A-til, en léttskýjað syðra. Hiti um eða undir frostmarki.

Á sunnudag:

Gengur líklega í suðaustan storm með rigningu eða slyddu og hlýnandi veðri, fyrst V-til.

Á mánudag:

Snýst í suðlæga átt og styttir upp N- og A-til, annars skúrir eða él. Kólnar í veðri.

Á þriðjudag:

Útlit fyrir suðlæga átt og slydduél eða él um landið sunnanvert, en bjart fyrir norðan. Svalt í veðri.