Samtök atvinnuveitenda í sviðslistum bregðast við stöðunni innan menningargeirans

Stjórnendur þeirra menningarstofnana sem eiga aðild að SAVÍST, samtökum atvinnuveitenda í sviðslistum, ætla bregðast við stöðunni sem uppi er varðandi áreitni, ofbeldi og hvers konar misbeitingu valds í menningargeiranum og láta gera sameiginlega faglega úttekt á stöðunni sem verður fylgt eftir með markvissum hætti í samráði við hlutaðeigandi fagfélög.

Þetta kemur fram í sameiginlegri tilkynningu frá SAVÍST sem send var í kjölfar undirskriftalista kvenna innan sviðslista og kvikmyndagerðar hér á landi þar sem gerð var krafa um breytingar. 

Sjá einnig: Tjaldið fellur: Konur úr sviðslistum og kvikmyndagerð segja frá ofbeldi og kynferðislegri áreitni

Konur sem starfa eða hafa starfað innan sviðslista og kvikmyndagerðar á Íslandi hafa á síðustu dögum deilt nafnlausum reynslusögum um kynferðisofbeldi, áreitni og mismunun innan stéttarinnar á lokuðum Facebook-hóp. Voru 62 sögur gerðar opinberar sendar fjölmiðlum undir yfirskriftinni: Tjaldið fellur. 

Alls skrifuðu 548 konur innan stéttarinnar undir yfirlýsingu þar sem sagði að konur í þessum bransa væru „í raun mjög berskjaldaðar, bæði vegna smæðar samfélagsins og hversu fá tækifæri er um að ræða, og líka vegna frægðar og áhrifa gerendanna sem gerir þeim mjög erfitt um vik og þaggar ennfremur niður í þeim.“

Konurnar sem skrifuðu undir krefjast þess að fá að vinna vinnu sína án áreitni, ofbeldis eða mismunar. Þá krefjast þær að yfirvöld, leikhús og framleiðslufyrirtæki taki af festu á málinu og komi sér upp viðbragðsáætlun og verkferlum.

Taka ábyrgðina alvarlega

Í tilkynningu SAVÍST sem send var á fjölmiðla í dag segir meðal annars: 

„Við tökum þá ábyrgð mjög alvarlega að skapa starfsfólki í menningarstofnunum öruggt starfsumhverfi og munum gera allt sem í okkar valdi stendur til þess að tryggja að svo verði.“

Undir yfirlýsinguna skrifa Ari Matthíasson Þjóðleikhússtjóri, Arna Kristín Einarsdóttir framkvæmdastjóri Sinfóníuhljómsveitar Íslands, Erna Ómarsdóttir listdansstjóri Íslenska Dansflokksins, Kristín Eysteinsdóttir Borgarleikhússtjóri, Magnús Geir Þórðarson, útvarpsstjóri, Steinunn Birna Ragnarsdóttir óperustjóri og Þuríður Helga Kristjánsdóttir, framkvæmdastjóri Menningarfélags Akureyrar og Leikfélags Akureyrar.

Í samtali við Vísi fyrr í mánuðinum sögðu Ari, Kristín og Magnús Geir öll að fá mál tengd kynferðislegri áreitni, ofbeldi og misbeitingu valds hefðu komið upp á borð hjá sér. Þekkt leikkona sagði í umfjöllun Vísis um þessi mál innan leiklistarinnar að það væri hægt að líkja þessu við snjóskafl sem þyrfti að bræða. Reyndist ástandið mun verra en leikhússtjórar voru meðvitaðir um ef sögur kvennanna eru skoðaðar og fjöldi undirskriftanna.