Celtics óstöðvandi á meðan ekkert gengur hjá Oklahoma City Thunder | Myndbönd

Fátt virðist geta stöðvað Boston Celtics þessa dagana en liðið vann enn einn leikinn í nótt þegar þeir fóru til Indiana og lögðu Pacers. Alls fóru 10 leikir fram vestanhafs í NBA boltanum í nótt.

Pacers byrjaði leikinn betur en frábær þriðji leikhluti lagði grunninn að sjötta sigri Celtics í röð. Lokatölur 98-108 og hélt Kyrie Irving uppteknum hætti í stigaskorun með því að setja 25 stig á töfluna.

 

Hvorki gengur né rekur hjá Oklahoma City Thunder þó liðið skarti þríeykinu Russell Westbrook, Paul George og Carmelo Anthony. Í nótt beið liðið lægri hlut fyrir Dallas Mavericks, 97-81.

Gamla brýnið Dirk Nowitzki sýndi að hann er ekki dauður úr öllum æðum þrátt fyrir 39 ára aldur en hann setti niður 19 stig sem er það mesta hjá honum á tímabilinu til þessa en þetta var aðeins fimmti sigur Dallas í vetur.

 

 

Tröllatvenna Anthony Davis dugði skammt þegar New Orleans Pelicans heimsótti meistarana í Golden State Warriors. Davis skoraði 30 stig og tók 15 fráköst í fimmtán stiga tapi, 110-95.

Kevin Durant er frá vegna meiðsla þessa dagana og voru þeir Stephen Curry og Klay Thompson atkvæðamestir í liði Warriors með 27 og 24 stig.

 

 

James Harden átti frábæran leik í liði Houston Rockets sem lagði New York Knicks að velli, 117-102. Harden setti niður 37 stig og gaf 10 stoðsendingar en Michael Beasley var atkvæðamestur í liði Knicks með 30 stig.

Stór skörð voru höggvin í lið Knicks þar sem hvorki Enes Kanter né Kristaps Porzingis voru með.

 

Úrslit næturinnar

Philadelphia 76ers 130-111 Orlando Magic

Charlotte Bobcats 86-106 San Antonio Spurs

Washington Wizards 105-108 Portland Trailblazers

Atlanta Hawks 78-112 Toronto Raptors

Indiana Pacers 98-108 Boston Celtics

Houston Rockets 117-102 New York Knicks

Golden State Warriors 110-95 New Orleans Pelicans

Dallas Mavericks 97-81 Oklahoma City Thunder

Utah Jazz 121-108 Milwaukee Bucks

Sacramento Kings 95-97 Los Angeles Clippers