Biðja ökumann sem keyrði á gangandi vegfaranda að gefa sig fram við lögreglu

Lögreglan á Norðurlandi eystra biður ökumann sem keyrði á gangandi vegfaranda á milli klukkan 10 og 11 í morgun sem var að fara yfir gangbraut að gefa sig fram. Óhappið átti sér stað á gangbraut við Mímisbraut á Akureyri, norðan við Verkmenntaskólann á Akureyri.

Að því er fram kemur í tilkynningu frá lögreglunni ók ökumaður bifreiðarinnar af vettvangi eftir að hafa rætt stuttlega við vegfarandann.

„Við biðjum ökumann bifreiðarinnar að gefa sig fram á Lögreglustöðinni á Akureyri svo hægt sé að taka skýrslu af honum vegna málsins. Einnig biðjum við ef einhver vitni urðu af óhappinu og geta gefið okkur upplýsingar að hafa samband við Lögregluna á Akureyri með því að senda okkur skilaboð hér,“ segir í tilkynningu lögreglunnar.